mujhe rasta nahin milta

mujhe rasta nahīñ miltā

maiñ jauhaḌ meñ khile phūloñ ke haq meñ bol kar

daldal kī tah meñ dhañs gayā huuñ

meñ nahīñ kahtā ki ye kis āsmāñ kā kaun sā sayyāra-e-bad hai

magar ye tah zamīñ kī āḳhirī chhat hai

yahāñ din hī nikaltā hai na shām-e-umr Dhaltī hai

parinda bhī nahīñ koī ki jis ke paañv se koī

navishta bāñdh kar bhejūñ to samjhūñ us se milne kā

bahāna haath aayā hai

sitāra bhī nahīñ koī ki jis se guftugū Thahre

navāh-e-jism meñ phailī ḳhizar-āsār tanhā.ī mirī sāñseñ baḌhātī hai

mujhe is daldalī goshe se jaane kā koī rasta nahīñ miltā

san ai merī ḳhizar-āsār tanhā.ī

mirī ḳhātir bhī thoḌā sā taraddud kar

mujhe bhī to 'sikandar' ke janāze meñ pahuñchnā hai

mujhe bhī āb-e-haivāñ se chhalaktī maut kā nauha sunānā hai

mujhe bhī duur jaanā hai

san ai merī ḳhizar-āsār tanhā.ī

mujhe is tuḳhm-e-imkāñ ke darīche se nikalne de

numū kī chaal chalne de

mujhe rasta nahīñ miltā

mujhe rasta nahin milta

main jauhaD mein khile phulon ke haq mein bol kar

daldal ki tah mein dhans gaya hun

mein nahin kahta ki ye kis aasman ka kaun sa sayyara-e-bad hai

magar ye tah zamin ki aaKHiri chhat hai

yahan din hi nikalta hai na sham-e-umr Dhalti hai

parinda bhi nahin koi ki jis ke panw se koi

nawishta bandh kar bhejun to samjhun us se milne ka

bahana hath aaya hai

sitara bhi nahin koi ki jis se guftugu Thahre

nawah-e-jism mein phaili KHizar-asar tanhai meri sansen baDhati hai

mujhe is daldali goshe se jaane ka koi rasta nahin milta

san ai meri KHizar-asar tanhai

meri KHatir bhi thoDa sa taraddud kar

mujhe bhi to 'sikandar' ke janaze mein pahunchna hai

mujhe bhi aab-e-haiwan se chhalakti maut ka nauha sunana hai

mujhe bhi dur jaana hai

san ai meri KHizar-asar tanhai

mujhe is tuKHm-e-imkan ke dariche se nikalne de

numu ki chaal chalne de

mujhe rasta nahin milta