mujhe wo nazm likhni hai

mujhe vo nazm likhnī hai

ki har andāz-e-mausīqī se dohrāyā karūñ jis ko

magar uktā na jā.ūñ baar baar apne hī gaane se

yuuñ hī bas zindagī ke saaz par gaayā karūñ jis ko

magar ghabrā na jā.ūñ zindagānī ke fasāne se

mujhe vo nazm likhnī hai

ki jis meñ zohra-o-nāhīd sab raqsāñ to hoñ lekin

kabhī mazdūr ke andoh-gīñ ruḳhsār bhī dekhūñ

hazāroñ raqs-hā-e-dil-nashīñ pinhāñ to hoñ lekin

kabhī talvār kī haibat-fazā jhankār bhī dekhūñ

mujhe vo nazm likhnī hai

ki jis ko maut kī āvāz se nafrat to ho lekin

payām-e-zindagī kuchh hausla-sāmāñ bhī hotā ho

bahār-e-zindagī ġhairat-dah-e-jannat to ho lekin

ġharīb insān is jannat se kuchh shādāñ bhī hotā ho

mujhe vo nazm likhnī hai

mujhe wo nazm likhni hai

ki har andaz-e-mausiqi se dohraya karun jis ko

magar ukta na jaun bar bar apne hi gane se

yun hi bas zindagi ke saz par gaya karun jis ko

magar ghabra na jaun zindagani ke fasane se

mujhe wo nazm likhni hai

ki jis mein zohra-o-nahid sab raqsan to hon lekin

kabhi mazdur ke andoh-gin ruKHsar bhi dekhun

hazaron raqs-ha-e-dil-nashin pinhan to hon lekin

kabhi talwar ki haibat-faza jhankar bhi dekhun

mujhe wo nazm likhni hai

ki jis ko maut ki aawaz se nafrat to ho lekin

payam-e-zindagi kuchh hausla-saman bhi hota ho

bahaar-e-zindagi ghairat-dah-e-jannat to ho lekin

gharib insan is jannat se kuchh shadan bhi hota ho

mujhe wo nazm likhni hai