mulaqaten nahin phir bhi mulaqaten

subū TuuTe

mohabbat kī namāzoñ meñ

vazū TuuTe

duā roī

duā ke āsmānoñ par

ka.ī chashmān o lab ro.e

kabhī koī sabab rone kā niklā hai

magar ham be-sabab ro.e

zamīnoñ aur zamānoñ kī ajab

rañjū gardish meñ

havā ke āstāne par

jhukā.e sar pashīmāñ be-zabāñ

tanhā.iyoñ ke qāfile utre

vahī ham the

mujassam bandagī zaḳhmī tamāshe ke nishāne par

kabhī sahme hue ḳhvāhish kī

retīlī fazāoñ meñ

tumheñ dekhā tumheñ chāhā

kabhī mausam-e-farāmoshī ke narġhe meñ

udāsī kī fasīloñ par

azān-e-ḳhud-kalāmī dī

tumhāre fāsloñ ko apnī mahrūmī kī ḳhalvat meñ

biThāyā bām-o-dar ko

ajnabiyat ke sitāroñ se sajāyā

vahī ham the

hamārī baat ke raqs-e-junūñ meñ

kho diyā tum ko

vahī tum the

vidā-e-lamha-e-ta.ajīl kī ḳhātir

thake TuuTe hue aa kar lipaT jaane

kī ḳhvāhish meñ

bikharte apnī āñkhoñ ke muqaddas motiyoñ meñ

lamha-e-āḳhir guzar jaane kī dhun meñ

umr-bhar ḳhud se gurezāñ rah ga.e

ham tum hijāb-e-nā-shanāsā.ī ke

mujrim ban ga.e

har fāsla kitne adhūre fāsloñ kā

isti.āra hai

samundar dekh terī āstīnoñ meñ

fuġhāñ kartā kināra hai

mulāqāteñ, nahīñ phir bhī mulāqāteñ

mulāqātoñ kī kuchh ummīd baaqī rah na jaa.e

ashk kā ik āḳhirī qatra bhī

yūñhī bah na jaa.e

subu TuTe

mohabbat ki namazon mein

wazu TuTe

dua roi

dua ke aasmanon par

kai chashman o lab roe

kabhi koi sabab rone ka nikla hai

magar hum be-sabab roe

zaminon aur zamanon ki ajab

ranju gardish mein

hawa ke aastane par

jhukae sar pashiman be-zaban

tanhaiyon ke qafile utre

wahi hum the

mujassam bandagi zaKHmi tamashe ke nishane par

kabhi sahme hue KHwahish ki

retili fazaon mein

tumhein dekha tumhein chaha

kabhi mausam-e-faramoshi ke narghe mein

udasi ki fasilon par

azan-e-KHud-kalami di

tumhaare faslon ko apni mahrumi ki KHalwat mein

biThaya baam-o-dar ko

ajnabiyat ke sitaron se sajaya

wahi hum the

hamari baat ke raqs-e-junun mein

kho diya tum ko

wahi tum the

wida-e-lamha-e-tajil ki KHatir

thake TuTe hue aa kar lipaT jaane

ki KHwahish mein

bikharte apni aankhon ke muqaddas motiyon mein

lamha-e-aKHir guzar jaane ki dhun mein

umr-bhar KHud se gurezan rah gae

hum tum hijab-e-na-shanasai ke

mujrim ban gae

har fasla kitne adhure faslon ka

istiara hai

samundar dekh teri aastinon mein

fughan karta kinara hai

mulaqaten, nahin phir bhi mulaqaten

mulaqaton ki kuchh ummid baqi rah na jae

ashk ka ek aaKHiri qatra bhi

yunhi bah na jae