mulamma ki anguThi

chāñdī kī añgūThī pe jo sone kā chaḌhā jhol

ochhī thī lagī bolne itrā ke baḌā bol

ai dekhne vaalo tumhī insāf se kahnā

chāñdī kī añgūThī bhī hai kuchh gahnoñ meñ gahnā

chāñdī kī añgūThī ke na maiñ saath rahūñgī

vo aur hai maiñ aur ye zillat na sahūñgī

maiñ qaum kī ūñchī huuñ baḌā merā gharānā

vo zaat kī ghaTiyā hai nahīñ us kā Thikānā

merī sī kahāñ chāshnī merā sā kahāñ rañg

vo mol meñ aur tol meñ mere nahīñ pāssañg

merī sī chamak us meñ na merī sī damak hai

chāñdī hai ki hai raañg mujhe is meñ bhī shak hai

ye sunte hī chāñdī kī añgūThī bhī ga.ī jal

allāh-re mulamme kī añgūThī tere chhal-bal

sone kī mulamme pe na itrā merī pyārī

do din meñ bhaḌak us kī utar jā.egī saarī

kuchh der haqīqat ko chhupāyā bhī to phir kyā

jhūToñ ne jo sachchoñ ko chaḌhāyā bhī to phir kyā

mat bhuul kabhī asal tū apnī arī ahmaq

jab taav diyā jā.egā ho jā.egā muñh faq

sachche kī to izzat hī baḌhegī jo kareñ jāñch

mash.hūr masal hai ki nahīñ sāñch ko kuchh aañch

khone ko kharā ban ke nikharnā nahīñ achchhā

chhoTe ko baḌā ban ke ubharnā nahīñ achchhā

chandi ki anguThi pe jo sone ka chaDha jhol

ochhi thi lagi bolne itra ke baDa bol

ai dekhne walo tumhi insaf se kahna

chandi ki anguThi bhi hai kuchh gahnon mein gahna

chandi ki anguThi ke na main sath rahungi

wo aur hai main aur ye zillat na sahungi

main qaum ki unchi hun baDa mera gharana

wo zat ki ghaTiya hai nahin us ka Thikana

meri si kahan chashni mera sa kahan rang

wo mol mein aur tol mein mere nahin passang

meri si chamak us mein na meri si damak hai

chandi hai ki hai rang mujhe is mein bhi shak hai

ye sunte hi chandi ki anguThi bhi gai jal

allah-re mulamme ki anguThi tere chhal-bal

sone ki mulamme pe na itra meri pyari

do din mein bhaDak us ki utar jaegi sari

kuchh der haqiqat ko chhupaya bhi to phir kya

jhuTon ne jo sachchon ko chaDhaya bhi to phir kya

mat bhul kabhi asal tu apni ari ahmaq

jab taw diya jaega ho jaega munh faq

sachche ki to izzat hi baDhegi jo karen jaanch

mashhur masal hai ki nahin sanch ko kuchh aanch

khone ko khara ban ke nikharna nahin achchha

chhoTe ko baDa ban ke ubharna nahin achchha