munajat-e-bewa

(1)

ai sab se avval aur āḳhir

jahāñ-tahāñ, hāzir aur nāzir

ai sab dānāoñ se daanā

saare tavānāoñ se tavānā

ai bālā, har bālā-tar se

chāñd se sūraj se ambar se

ai samjhe būjhe bin sūjhe

jāne-pahchāne bin būjhe

sab se anokhe sab se nirāle

aañkh se ojhal dil ke ujāle

ai andhoñ kī aañkh ke taare

ai lañgḌe lūloñ ke sahāre

nātiyoñ se chhoToñ ke naatī

sāthiyoñ se bichhḌoñ ke sāthī

naav jahāñ kī khene vaale

dukh meñ tasallī dene vaale

jab ab tab tujh sā nahīñ koī

tujh se haiñ sab tujh sā nahīñ koī

jot hai terī jal aur thal meñ

baas hai terī phuul aur phal meñ

har dil meñ hai terā baserā

tū paas aur ghar duur hai terā

raah tirī dushvār aur sukḌī

naam tirā rah-gīr kī lakḌī

tū hai Thikānā miskīnoñ kā

tū hai sahārā ġhamgīnoñ kā

tū hai akeloñ kā rakhvālā

tū hai añdhere ghar kā ujālā

laagū achchhe aur bure kā

ḳhvāhāñ khoTe aur khare kā

bed nirāse bīmāroñ kā

gāhak mande bāzāroñ kā

soch meñ dil bahlāne vaale

biptā meñ yaad aane vaale

(2)

ai be-vāris gharoñ ke vāris

be-bāzū be-paroñ ke vāris

be-āsoñ kī aas hai tū hī

jāgte sote paas hai tū hī

bas vaale haiñ yā be-bas haiñ

tū nahīñ jin kā vo be-kas haiñ

sāthī jin kā dhyān hai terā

dusrāyat kī vahāñ nahīñ parvā

dil meñ hai jin ke terī baḌā.ī

ginte haiñ vo parbat ko raa.ī

bekas kā ġham-ḳhvār hai tū hī

burī banī kā yaar hai tū hī

dukhiyā dukhī yatīm aur beva

tere hī haath un sab kā hai khevā

tū hī maraz de tū hī davā de

tū hī davā-dārū meñ shifā de

tū hī pilā.e zahr ke pyāle

tū hī phir amrit zahr meñ Daale

tū hī diloñ meñ aag lagā.e

tū hī diloñ kī lagī bujhā.e

chumkāre chumkār ke maare

maare maar ke phir chumkāre

pyaar kā tere pūchhnā kyā hai

maar meñ bhī ik terī mazā hai

(3)

ai rahmat aur haibat vaale

shafqat aur dabāġhat vaale

ai aTkal aur dhyān se bāhar

jaan se aur pahchān se bāhar

aql se koī pā nahīñ saktā

bhed tire hukmoñ meñ haiñ kyā kyā

ek ko tū ne shaad kiyā hai

ek ke dil ko daaġh diyā hai

us se na terā pyaar kuchh aisā

us se na tū bezār kuchh aisā

har dam terī aan na.ī hai

jab dekho tab shaan na.ī hai

yahāñ pachhuā hai vahāñ purvā hai

ghar ghar terā hukm nayā hai

phuul kahīñ kumlā.e hue haiñ

aur kahīñ phal aa.e hue haiñ

khetī ek kī hai lahrātī

ek kā har dam ḳhuun sukhātī

ek paḌe haiñ dhan ko Dubo.e

ek haiñ ghoḌe bech ke so.e

ek ne jab se hosh sambhālā

rañj se us ko paḌā na paalā

ek ne is janjāl meñ aa kar

chain na dekhā aañkh uThā kar

meñh kahīñ daulat kā hai barastā

hai koī paanī tak ko tarastā

ek ko marne tak nahīñ dete

ek uktā gayā lete lete

haal ġharaz duniyā kā yahī hai

ġham pahle aur ba.ad ḳhushī hai

rañj kā hai duniyā ke gilā kyā

tohfa yahī le de ke hai yaañ kā

yahāñ nahīñ bantī rañj sahe bin

rañj nahīñ sab ek se lekin

ek se yahāñ rañj ek hai baalā

ek se hai dard ek nirālā

ghaav hai go nāsūr kī sūrat

par use kyā nāsūr se nisbat

tap vahī diq kī shakl hai lekin

diq nahīñ rahtī jaan liye bin

diq ho vo yā nāsūr ho kuchh ho

de na jo ab ummīd kisī ko

roz kā ġham kyūñ-kar sahe koī

aas na jab baaqī rahe koī

tū hī kar insāf ai mire maulā

kaun hai jo be-ās hai jiitā

go ki bahut bande haiñ pur-armāñ

kam haiñ magar māyūs haiñ jo yaañ

ḳhvāh dukhī hai ḳhvāh sukhī hai

jo hai ik ummīd us ko bañdhī hai

khetiyāñ jin kī khaḌī haiñ sūkhī

aas vo bāñdhe baiThe haiñ meñh kī

ghaTā jin kī asāḌī meñ hai

sāvanī kī ummīd nahīñ hai

Duub chukī hai un kī agetī

detī hai Dhāras un ko pachhetī

ek hai is ummīd pe jiitā

ab huī beTī ab huā beTā

ek ko jo aulād milī hai

us ko umañg shādiyoñ kī hai

rañj hai yā qismat meñ ḳhushī hai

kuchh hai magar ik aas bañdhī hai

ġham nahīñ un ko ġhamgīñ haiñ

jo dil nā-umīd nahīñ haiñ

kaal meñ kuchh saḳhtī nahīñ aisī

kaal meñ hai jab aas samayñ kī

sahal hai maujoñ se chhuTkārā

jab ki nazar aatā hai kinārā

par nahīñ uTh saktī vo musībat

aa.egī jis ke ba.ad na rāhat

shaad ho us rah-gīr kā kyā dil?

mar ke kaTegī jis kī manzil

un ujḌoñ ko kal paḌe kyūñ-kar

ghar na basegā jin kā janam bhar

un bichhḌoñ kā kyā hai Thikānā?

jin ko na milne degā zamāna

ab ye balā Taltī nahīñ Taalī

mujh pe hai jo taqdīr ne Daalī

aa.iiñ bahut duniyā meñ bahāreñ

aish kī ghar ghar paḌīñ pukāreñ

paḌe bahut bāġhoñ meñ jhūle

Dhaak bahut jañgal meñ phūle

ga.iiñ aur aa.eñ chāñdnī rāteñ

barsīñ khulīñ bahut barsāteñ

par na khilī hargiz na khilegī

vo jo kalī murjhā.ī thī dil kī

aas hī kā bas naam hai duniyā

jab na rahī yahī to rahā kyaa?

aise bidesī kā nahīñ ġham kuchh

jis ko na ho milne kī qasam kuchh

ronā un ban-bāsiyoñ kā hai

des nikālā jin ko milā hai

hukm se tere par nahīñ chāra

kaḌvī mīThī sab hai gavārā

zor hai kyā patte kā havā par

chāhe jidhar le jaa.e uḌā kar

tinkā ik aur saat samundar

jaa.e kahāñ maujoñ se nikal kar

qismat hī meñ jab thī judā.ī

phir Taltī kis tarah ye aa.ii?

aaj kī bigḌī ho to bane bhī

azal kī bigḌī ḳhaak banegī

tū jo chāhe vo nahīñ Taltā

bande kā yaañ bas nahīñ chaltā

maare aur na de tū rone

thapke aur na de tū sone

Thahre ban aatī hai na bhāge

terī zabardastī ke aage

tujh se kahīñ gar bhāgnā chāheñ

band haiñ chāroñ khūñT kī rāheñ

tū maare aur ḳhvāh navāze

paḌī huī huuñ maiñ tere darvāze

tujh ko apnā jāntī huuñ maiñ

tujh se nahīñ to kis se kahūñ maiñ

maañ hī sadā bachche ko maare

aur bachcha maañ maañ hī pukāre

(4)

ai mire zor aur qudrat vaale

hikmat aur hukūmat vaale

maiñ lauñDī terī dukhyāre

darvāze kī terī bhikārī

maut kī ḳhvāhāñ jaan kī dushman

jaan apnī hai aap ajīran

apne parā.e kī dhutkārī

maike aur sasurāl pe bhārī

sah ke bahut āzār chalī huuñ

duniyā se bezār chalī huuñ

dil par mere daaġh haiñ jitne

muñh meñ bol nahīñ haiñ utne

dukh dil kā kuchh kah nahīñ saktī

is ke sivā kuchh kah nahīñ saktī

tujh pe hai raushan sab dukh dil kā

tujh se haqīqat apnī kahūñ kyā

byaah ke dam paa.ī thī na lene

lene ke yaañ paḌ ga.e dene

ḳhushī meñ bhī dukh saath na aayā

ġham ke sivā kuchh haat na aayā

ek ḳhushī ne ġham ye dikhā.e

ek hañsī ne gul hī khilā.e

kaisā thā ye byaah nināvāñ

jūñhī paḌā is kā parchāvāñ

chain se rahne diyā na jī ko

kar diyā maliyāmeT ḳhushī ko

ro nahīñ saktī tañg huuñ yaañ tak

aur ro.uuñ to ro.uuñ kahāñ tak

hañs hañs dil bahlā.ūñ kyūñ-kar

osoñ pyaas bujhā.ūñ kyūñ-kar

ek kā kuchh jiinā nahīñ hotā

ek na hañstā bhalā na rotā

leTe gar sone ke bahāne

pā.entī kal hai aur na sirhāne

jāgiye to bhī ban nahīñ paḌtī

jāgne kī āḳhir koī had bhī

ab kal ham ko paḌegī mar kar

gor hai suunī sej se behtar

baat se nafrat kaam se vahshat

TuuTī aas aur bujhī tabī.at

ābādī jañgal kā namūna

duniyā suunī aur ghar suunā

din hai bhayānak aur raat Darānī

yuuñ guzrī saarī ye javānī

bahneñ aur bahneliyāñ merī

saath kī jo thiiñ kheliyāñ merī

mil na sakīñ jī khol ke mujh se

ḳhush na huiiñ hañs bol ke mujh se

jab aa.iiñ ro-dho ke ga.iiñ vo

jab ga.iiñ be-kal ho ke ga.iiñ vo

koī nahīñ dil kā bahlāvā

aa nahīñ chuktā merā bulāvā

aaTh pahar kā hai ye julāpā

kāTūñgī kis tarah rañDāpā

thak ga.ī dukh sahte sahte

tham ga.e aañsū bahte bahte

aag khulī dil kī na kisī par

ghul ga.ī jaan andar hī andar

dekh ke chup jaanā na kisī ne

jaan ko phūñkā dil kī lagī ne

dabī thī bhobhal meñ chiñgārī

lī na kisī ne ḳhabar hamārī

qaum meñ vo ḳhushiyāñ biyāhoñ kī

shahr meñ vo dho.eñ sāhoñ kī

tyauhāroñ kā aa.e din aanā

aur sab kā tyauhār manānā

vo chait aur phāgun kī havā.eñ

vo sāvan bhādoñ kī ghaTā.eñ

vo garmī kī chāñdnī rāteñ

vo armān bharī barsāteñ

kis se kahūñ kis taur se kāTeñ

ḳhair kaTeñ jis taur se kāTeñ

chaav ke aur ḳhushiyoñ ke samay sab

aate haiñ ḳhush kal jaan ko ho jab

rañj meñ haiñ sāmān ḳhushī ke

aur jalāne vaale hī ke

ghar barkhā aur piyā bidesī

aa.iyo barkhā kahīñ na aisī

din ye javānī ke kaTe aise

baaġh meñ panchhī qaid ho jaise

rut ga.ī saarī sar Takrāte

uḌ na sake par hote saare

kisī ne hogī kuchh kal paa.ī

mujhe to shādī raas na aa.ī

aas bañdhī lekin na milā kuchh

phuul aayā aur phal na lagā kuchh

rah gayā de kar chāñd dikhā.ī

chāñd huā par iid na aa.ī

phal kī ḳhātir barchhī khaa.ī

phal na milā aur jaan gañvā.ī

ret meñ zarre dekh chamakte

dauḌ paḌī meñ jhiil samajh ke

chāroñ khūñT nazar dauḌā.ī

par paanī kī buuñd na paa.ī

(1)

ai sab se awwal aur aaKHir

jahan-tahan, hazir aur nazir

ai sab danaon se dana

sare tawanaon se tawana

ai baala, har baala-tar se

chand se suraj se ambar se

ai samjhe bujhe bin sujhe

jaane-pahchane bin bujhe

sab se anokhe sab se nirale

aankh se ojhal dil ke ujale

ai andhon ki aankh ke tare

ai langDe lulon ke sahaare

natiyon se chhoTon ke nati

sathiyon se bichhDon ke sathi

naw jahan ki khene wale

dukh mein tasalli dene wale

jab ab tab tujh sa nahin koi

tujh se hain sab tujh sa nahin koi

jot hai teri jal aur thal mein

bas hai teri phul aur phal mein

har dil mein hai tera basera

tu pas aur ghar dur hai tera

rah teri dushwar aur sukDi

nam tera rah-gir ki lakDi

tu hai Thikana miskinon ka

tu hai sahaara ghamginon ka

tu hai akelon ka rakhwala

tu hai andhere ghar ka ujala

lagu achchhe aur bure ka

KHwahan khoTe aur khare ka

bed nirase bimaron ka

gahak mande bazaron ka

soch mein dil bahlane wale

bipta mein yaad aane wale

(2)

ai be-waris gharon ke waris

be-bazu be-paron ke waris

be-ason ki aas hai tu hi

jagte sote pas hai tu hi

bas wale hain ya be-bas hain

tu nahin jin ka wo be-kas hain

sathi jin ka dhyan hai tera

dusrayat ki wahan nahin parwa

dil mein hai jin ke teri baDai

ginte hain wo parbat ko rai

bekas ka gham-KHwar hai tu hi

buri bani ka yar hai tu hi

dukhiya dukhi yatim aur bewa

tere hi hath un sab ka hai khewa

tu hi maraz de tu hi dawa de

tu hi dawa-daru mein shifa de

tu hi pilae zahr ke pyale

tu hi phir amrit zahr mein Dale

tu hi dilon mein aag lagae

tu hi dilon ki lagi bujhae

chumkare chumkar ke mare

mare mar ke phir chumkare

pyar ka tere puchhna kya hai

mar mein bhi ek teri maza hai

(3)

ai rahmat aur haibat wale

shafqat aur dabaghat wale

ai aTkal aur dhyan se bahar

jaan se aur pahchan se bahar

aql se koi pa nahin sakta

bhed tere hukmon mein hain kya kya

ek ko tu ne shad kiya hai

ek ke dil ko dagh diya hai

us se na tera pyar kuchh aisa

us se na tu bezar kuchh aisa

har dam teri aan nai hai

jab dekho tab shan nai hai

yahan pachhua hai wahan purwa hai

ghar ghar tera hukm naya hai

phul kahin kumlae hue hain

aur kahin phal aae hue hain

kheti ek ki hai lahraati

ek ka har dam KHun sukhati

ek paDe hain dhan ko Duboe

ek hain ghoDe bech ke soe

ek ne jab se hosh sambhaala

ranj se us ko paDa na pala

ek ne is janjal mein aa kar

chain na dekha aankh uTha kar

meinh kahin daulat ka hai barasta

hai koi pani tak ko tarasta

ek ko marne tak nahin dete

ek ukta gaya lete lete

haal gharaz duniya ka yahi hai

gham pahle aur baad KHushi hai

ranj ka hai duniya ke gila kya

tohfa yahi le de ke hai yan ka

yahan nahin banti ranj sahe bin

ranj nahin sab ek se lekin

ek se yahan ranj ek hai baala

ek se hai dard ek nirala

ghaw hai go nasur ki surat

par use kya nasur se nisbat

tap wahi diq ki shakl hai lekin

diq nahin rahti jaan liye bin

diq ho wo ya nasur ho kuchh ho

de na jo ab ummid kisi ko

roz ka gham kyun-kar sahe koi

aas na jab baqi rahe koi

tu hi kar insaf ai mere maula

kaun hai jo be-as hai jita

go ki bahut bande hain pur-arman

kam hain magar mayus hain jo yan

KHwah dukhi hai KHwah sukhi hai

jo hai ek ummid us ko bandhi hai

khetiyan jin ki khaDi hain sukhi

aas wo bandhe baiThe hain meinh ki

ghaTa jin ki asaDi mein hai

sawani ki ummid nahin hai

Dub chuki hai un ki ageti

deti hai Dhaaras un ko pachheti

ek hai is ummid pe jita

ab hui beTi ab hua beTa

ek ko jo aulad mili hai

us ko umang shadiyon ki hai

ranj hai ya qismat mein KHushi hai

kuchh hai magar ek aas bandhi hai

gham nahin un ko ghamgin hain

jo dil na-umid nahin hain

kal mein kuchh saKHti nahin aisi

kal mein hai jab aas samayn ki

sahal hai maujon se chhuTkara

jab ki nazar aata hai kinara

par nahin uTh sakti wo musibat

aaegi jis ke baad na rahat

shad ho us rah-gir ka kya dil?

mar ke kaTegi jis ki manzil

un ujDon ko kal paDe kyun-kar

ghar na basega jin ka janam bhar

un bichhDon ka kya hai Thikana?

jin ko na milne dega zamana

ab ye bala Talti nahin Tali

mujh pe hai jo taqdir ne Dali

aain bahut duniya mein bahaaren

aish ki ghar ghar paDin pukaren

paDe bahut baghon mein jhule

Dhak bahut jangal mein phule

gain aur aaen chandni raaten

barsin khulin bahut barsaten

par na khili hargiz na khilegi

wo jo kali murjhai thi dil ki

aas hi ka bas nam hai duniya

jab na rahi yahi to raha kya?

aise bidesi ka nahin gham kuchh

jis ko na ho milne ki qasam kuchh

rona un ban-basiyon ka hai

des nikala jin ko mila hai

hukm se tere par nahin chaara

kaDwi miThi sab hai gawara

zor hai kya patte ka hawa par

chahe jidhar le jae uDa kar

tinka ek aur sat samundar

jae kahan maujon se nikal kar

qismat hi mein jab thi judai

phir Talti kis tarah ye aai?

aaj ki bigDi ho to bane bhi

azal ki bigDi KHak banegi

tu jo chahe wo nahin Talta

bande ka yan bas nahin chalta

mare aur na de tu rone

thapke aur na de tu sone

Thahre ban aati hai na bhage

teri zabardasti ke aage

tujh se kahin gar bhagna chahen

band hain chaaron khunT ki rahen

tu mare aur KHwah nawaze

paDi hui hun main tere darwaze

tujh ko apna jaanti hun main

tujh se nahin to kis se kahun main

man hi sada bachche ko mare

aur bachcha man man hi pukare

(4)

ai mere zor aur qudrat wale

hikmat aur hukumat wale

main launDi teri dukhyare

darwaze ki teri bhikari

maut ki KHwahan jaan ki dushman

jaan apni hai aap ajiran

apne parae ki dhutkari

maike aur sasural pe bhaari

sah ke bahut aazar chali hun

duniya se bezar chali hun

dil par mere dagh hain jitne

munh mein bol nahin hain utne

dukh dil ka kuchh kah nahin sakti

is ke siwa kuchh kah nahin sakti

tujh pe hai raushan sab dukh dil ka

tujh se haqiqat apni kahun kya

byah ke dam pai thi na lene

lene ke yan paD gae dene

KHushi mein bhi dukh sath na aaya

gham ke siwa kuchh hat na aaya

ek KHushi ne gham ye dikhae

ek hansi ne gul hi khilae

kaisa tha ye byah ninawan

junhi paDa is ka parchawan

chain se rahne diya na ji ko

kar diya maliyameT KHushi ko

ro nahin sakti tang hun yan tak

aur roun to roun kahan tak

hans hans dil bahlaun kyun-kar

oson pyas bujhaun kyun-kar

ek ka kuchh jina nahin hota

ek na hansta bhala na rota

leTe gar sone ke bahane

paenti kal hai aur na sirhane

jagiye to bhi ban nahin paDti

jagne ki aaKHir koi had bhi

ab kal hum ko paDegi mar kar

gor hai suni sej se behtar

baat se nafrat kaam se wahshat

TuTi aas aur bujhi tabiat

aabaadi jangal ka namuna

duniya suni aur ghar suna

din hai bhayanak aur raat Darani

yun guzri sari ye jawani

bahnen aur bahneliyan meri

sath ki jo thin kheliyan meri

mil na sakin ji khol ke mujh se

KHush na huin hans bol ke mujh se

jab aain ro-dho ke gain wo

jab gain be-kal ho ke gain wo

koi nahin dil ka bahlawa

aa nahin chukta mera bulawa

aaTh pahar ka hai ye julapa

kaTungi kis tarah ranDapa

thak gai dukh sahte sahte

tham gae aansu bahte bahte

aag khuli dil ki na kisi par

ghul gai jaan andar hi andar

dekh ke chup jaana na kisi ne

jaan ko phunka dil ki lagi ne

dabi thi bhobhal mein chingari

li na kisi ne KHabar hamari

qaum mein wo KHushiyan biyahon ki

shahr mein wo dhoen sahon ki

tyauhaaron ka aae din aana

aur sab ka tyauhaar manana

wo chait aur phagun ki hawaen

wo sawan bhadon ki ghaTaen

wo garmi ki chandni raaten

wo arman bhari barsaten

kis se kahun kis taur se kaTen

KHair kaTen jis taur se kaTen

chaw ke aur KHushiyon ke samay sab

aate hain KHush kal jaan ko ho jab

ranj mein hain saman KHushi ke

aur jalane wale hi ke

ghar barkha aur piya bidesi

aaiyo barkha kahin na aisi

din ye jawani ke kaTe aise

bagh mein panchhi qaid ho jaise

rut gai sari sar Takraate

uD na sake par hote sare

kisi ne hogi kuchh kal pai

mujhe to shadi ras na aai

aas bandhi lekin na mila kuchh

phul aaya aur phal na laga kuchh

rah gaya de kar chand dikhai

chand hua par id na aai

phal ki KHatir barchhi khai

phal na mila aur jaan ganwai

ret mein zarre dekh chamakte

dauD paDi mein jhil samajh ke

chaaron khunT nazar dauDai

par pani ki bund na pai