munajat

ḳhudāvandā!

tirī iqlīm meñ rahte hue ik umr guzrī hai

magar ab tak tarīq-e-bandagī mujh ko nahīñ aayā

mire jazboñ ne ab tak jazb ke ma.anī nahīñ sīkhe

abhī tak ḳhvāhishoñ ke paas dil ko rehn rakkhā hai

abhī tak nīm-shab kī sā.atoñ kī barkateñ mujh par nahīñ utrīñ

mirī āñkhoñ meñ terī raushnī ke ḳhadd-o-ḳhāl ab tak nahīñ ubhre

mirī āñkheñ abhī tak be-basar haiñ

aur sitam ye hai

basīrat ke darīche vā nahīñ hote

ḳhudā-e-lam-yazal

tujh ko zavāl-e-ādamiyyat kī qasam

mujh se mirī ye bebasī le le

tujhe to ye ḳhabar hai

is jabīn-e-shauq meñ sajde taḌapte haiñ

magar maiñ rāñda-e-dargāh jab sajde meñ jaatā huuñ

to apnī tavajjoh

sahn ke mahfūz kone meñ rakhī jūtiyoñ meñ chhoḌ aatā huuñ

KHudawanda!

teri iqlim mein rahte hue ek umr guzri hai

magar ab tak tariq-e-bandagi mujh ko nahin aaya

mere jazbon ne ab tak jazb ke mani nahin sikhe

abhi tak KHwahishon ke pas dil ko rehn rakkha hai

abhi tak nim-shab ki saaton ki barkaten mujh par nahin utrin

meri aankhon mein teri raushni ke KHadd-o-KHal ab tak nahin ubhre

meri aankhen abhi tak be-basar hain

aur sitam ye hai

basirat ke dariche wa nahin hote

KHuda-e-lam-yazal

tujh ko zawal-e-adamiyyat ki qasam

mujh se meri ye bebasi le le

tujhe to ye KHabar hai

is jabin-e-shauq mein sajde taDapte hain

magar main randa-e-dargah jab sajde mein jata hun

to apni tawajjoh

sahn ke mahfuz kone mein rakhi jutiyon mein chhoD aata hun