munkir-e-haq

ik āvāz ubhartī aa rahī hai

dūdhiyā sī raushnī ik

parda-e-bīnā.ī se ho kar guzartī guzartī jā rahī hai

salb hotī jā rahī hai

quvvat-e-inkār bhī

iqrār bhī

kuchh ho rahā hai yā kahūñ kuchh hai

nahīñ ma.alūm kyā hai aur kyuuñ kuchh hai

ik amboh-e-farāvāñ

jauq-andar-jauq sab afrād

iqrā kī taraf jaate hue

aur maiñ udhar ġhār-e-hirā kī

chuhl-sāla ḳhāmushī meñ

mahv hotā jā rahā huuñ

ek 'hai' aur is qadar maujūd

lā-maujūd bhī 'hai' aur maiñ

ab us ko ḳhudā meñ qaid kar ke

munkir-e-haq ho rahā huuñ

indar andar ro rahā huuñ

ek aawaz ubharti aa rahi hai

dudhiya si raushni ek

parda-e-binai se ho kar guzarti guzarti ja rahi hai

salb hoti ja rahi hai

quwwat-e-inkar bhi

iqrar bhi

kuchh ho raha hai ya kahun kuchh hai

nahin malum kya hai aur kyun kuchh hai

ek amboh-e-farawan

jauq-andar-jauq sab afrad

iqra ki taraf jate hue

aur main udhar ghaar-e-hira ki

chuhl-sala KHamushi mein

mahw hota ja raha hun

ek 'hai' aur is qadar maujud

la-maujud bhi 'hai' aur main

ab us ko KHuda mein qaid kar ke

munkir-e-haq ho raha hun

indar andar ro raha hun