muqabla

zamīn-e-vietnam

maiñ bhī ik sar-zamīñ kā baasī huuñ

jo abhī tak mirī hai

kal kā pata nahīñ hai ki mere paañv mirī zamīn par phisal rahe haiñ

koī baḌe zor-dār hāthoñ se

duur baiThā

zamīn kā pallū pakaḌ ke apnī taraf use khīñchtā hī jaatā hai

maiñ khiñchā jā rahā hū pallū samet

Thahrūñ to mere paañv phisal rahe haiñ

maiñ dūsrī samt muñh agar kar ke bhaag niklūñ

zamīn khiñch jaa.e paañv se to ḳhalā meñ girne kā Dar hai mujh ko

zamīn-vietnam

is se pahle ki mere pairoñ tale se merī zamīn khiñch jaa.e

aaj tujh se muqābla apnā kar rahā huuñ

ki mujh meñ tujh meñ jo mushtarak qadar hai vo jañgī sa.ūbateñ haiñ

mirā bhī dushman vahī hai jo tujh se laḌ rahā hai

tirī zamīn par bhī jañg jaarī

mirī zamīñ par bhī jañg jaarī

agar koī farq hai to ye hai ki apne dushman ke sāmne tū bahādurī se Datā huā hai

maiñ jhuk gayā huuñ

yahāñ zarā muḳhtalif hai sūrat

ki merā dushman Datā huā hai

maiñ sar bhī apnā jhukā chukā huuñ

maiñ us kī minnat bhī kar chukā huuñ

magar vo be-rahm maare hī jā rahā hai

kisī tarah māntā nahīñ hai

bas apnī manvā.e jā rahā hai

zamīn-vietnam

tū ne itne baras gañvā.e

karoḌoñ afrād apne marvā.e

tū ne minnat hī kī na saudā kiyā na faujoñ kā sar jhukāyā

ajab ki tū ne ragoñ meñ ḳhuun kī bajā.e bārūd bhar liyā hai

tū bāvlī hai

ye dekh bārah karoḌ ke chand mālikoñ kā bhī kār-nāma

unheñ bhī ik jañg aa paḌī thī

unhoñ ne sola dinoñ meñ vo kar diyā jo sadiyoñ meñ bhī na hotā

jhukā diye apne laakh faujī

miTā diye apne laakh faujī

miTā diye apne nisf jhagḌe

kaTā diyā apnā nisf naqsha

jo nisf baaqī thā aur sola dinoñ kā jhagḌā thā gar ye rahtā

kyuuñ na hotā

ki har baḌī qaum kaam aise kiyā hī kartī hai jo ki tārīḳh ke liye baab kholte haiñ

ye kār-nāma

ye sirf tārīḳh kā nahīñ hai

ye kār-nāma to hai juġhrāfiya bhī jis ne badal diyā hai

bahut baḌī qaum kā ye kartab hai

qaum suī banānā apne liye jo tū jāntī nahīñ hai

ye qaum bārūd jis kī ḳhātir baḌe mamālik banā rahe haiñ

bahut baḌī qaum hai bahut hī

jahāz ke kār-ḳhāne bairūn-e-mulk jis ke bane hue haiñ

vo jis kī ḳhātir ki buke impala ford order pe ban rahī hai

mashīn engine miloñ kā sāmān kār-ḳhāne ke saare auzār

radio telephone television tracktor machine-gun top

ġharaz ek ek shai us kī us ke kamī ḳhud apne mulkoñ meñ us kī ḳhātir banā rahe haiñ

bahut baḌī qaum hai ki us ke baḌe gharoñ meñ to sar kā shave bhī

tan ke kapḌe bhī aur juute bhī us ke bāhar se aa rahe haiñ

zamīn-vietnam

terī maa.eñ to apne bachche ke qad ko dekhtī haiñ ki us kī lambā.ī car se to baḌī nahīñ hai

zamīn-vietnam

beTiyāñ terī apne shānoñ pe apne sheroñ kā bojh le kar paañv kī sūrat haiñ īstāda

magar yahāñ beTiyāñ nahīñ haiñ

yahāñ to tohfe haiñ

jo ki bāhar se aa.e saudāgaroñ kī ḳhātir tavāzo.a karne ke vāste kar rahe haiñ

zamīn-vietnam

tere beTe to tere vāris tire muhāfiz haiñ

fauj vo ban rahe haiñ terī ki tujh pe jāneñ nisār kar deñ

zamīn-vietnam

tere beTe to tere vāris tire muhāfiz haiñ

fauj vo ban rahe haiñ terī ki tujh pe jāneñ nisār kar deñ

yahāñ pe beTī nahīñ to beTe bhī is zamīñ ne nahīñ jane haiñ

yahāñ to tanḳhvāh kī zarūrat hai fauj meñ ho ki mauj meñ ho

zamīn-vietnam

terā aadam kahāñ se aayā thā

beTiyāñ terī kaun sī be-misāl havvā kī beTiyāñ haiñ

zamīn-e-vietnam terī miTTī kahāñ kī hai jo ki

tere dushman ne chāñd tasḳhīr kar liyā par na tujh ko jiitā

tirā ḳhudā kaun sā ḳhudā hai

mire ḳhudā kā salām us ko

magar mire vietnam jo farq tujh meñ mujh meñ hai aur thoḌā sā duur kar duuñ

tirī laḌā.ī to sirf dushman se hai ki jo tere sāmne hai

mirī laḌā.ī hai dushmanoñ se jo sāmne ho ke bhī mire sāmne nahīñ haiñ

maiñ dushmanoñ se bhī laḌ rahā huuñ

meñ dostoñ se bhī laḌ rahā huuñ jo dostī kā libās pahne

mirī laḌā.ī aḌosiyoñ se paḌosiyoñ se

mirī laḌā.ī hai apne ghar meñ

mirī laḌā.ī samundaroñ ke udhar bhī qaa.em

mirī laḌā.ī hai jism se bhī

mirī laḌā.ī hai zehn se bhī

mirī laḌā.ī to sāmrājī nizām se hai

jahāñ jahāñ sāmrāj hai maiñ vahāñ vahāñ par Datā huā huuñ

maiñ apnī ġhurbat se apnī mazlūmiyat se āgāh ho chukā huuñ

mirī ye ġhurbat ye merī mazlūmiyat hī quvvat hai

vo sipāhī nahīñ hai merā jo apne helmate ke bojh se sar jhukā chukā hai

jo sirf tanḳhvāh ke liye merā sher jarnail ban gayā hai

merā ye qallāsh merā be-kār merā mazdūr vo sipāhī hai

jo mirī fauj ban rahā hai

zamīn ke pallū ko apnī is taaza fauj kī be-panāh quvvat se thaam kar

ab maiñ apnī jānib ghasīT lūñgā

ghasīT lūñgā maiñ un ko bhī vo jo dūsrī samt apne aahan ke haath le kar

mirī zamīn apnī samt lālach se khīñchte haiñ

zamīn-e-vietnam gar tirī sar-zamīñ pe bārūd kī taheñ bichh ga.ī haiñ to us zamīñ

ke khetoñ meñ bhī faqat goliyāñ ugeñgī

yahāñ bhī peḌoñ ko ab phaloñ kī bajā.e bam hī lageñge

is sar-zamīñ pe bhī aag hī ke dariyā baheñge

jin maiñ ki koī kāġhaz kī naav vo sāmrāj kī ho ki merī apnī

na chal sakegī

zamīn-e-vietnam maiñ bhī ik sar-zamīñ kā baasī huuñ

is zamīñ kā salām tujh ko

zamin-e-wietnam

main bhi ek sar-zamin ka basi hun

jo abhi tak meri hai

kal ka pata nahin hai ki mere panw meri zamin par phisal rahe hain

koi baDe zor-dar hathon se

dur baiTha

zamin ka pallu pakaD ke apni taraf use khinchta hi jata hai

main khincha ja raha hu pallu samet

Thahrun to mere panw phisal rahe hain

main dusri samt munh agar kar ke bhag niklun

zamin khinch jae panw se to KHala mein girne ka Dar hai mujh ko

zamin-wietnam

is se pahle ki mere pairon tale se meri zamin khinch jae

aaj tujh se muqabla apna kar raha hun

ki mujh mein tujh mein jo mushtarak qadar hai wo jangi saubaten hain

mera bhi dushman wahi hai jo tujh se laD raha hai

teri zamin par bhi jang jari

meri zamin par bhi jang jari

agar koi farq hai to ye hai ki apne dushman ke samne tu bahaduri se Data hua hai

main jhuk gaya hun

yahan zara muKHtalif hai surat

ki mera dushman Data hua hai

main sar bhi apna jhuka chuka hun

main us ki minnat bhi kar chuka hun

magar wo be-rahm mare hi ja raha hai

kisi tarah manta nahin hai

bas apni manwae ja raha hai

zamin-wietnam

tu ne itne baras ganwae

karoDon afrad apne marwae

tu ne minnat hi ki na sauda kiya na faujon ka sar jhukaya

ajab ki tu ne ragon mein KHun ki bajae barud bhar liya hai

tu bawli hai

ye dekh barah karoD ke chand malikon ka bhi kar-nama

unhen bhi ek jang aa paDi thi

unhon ne sola dinon mein wo kar diya jo sadiyon mein bhi na hota

jhuka diye apne lakh fauji

miTa diye apne lakh fauji

miTa diye apne nisf jhagDe

kaTa diya apna nisf naqsha

jo nisf baqi tha aur sola dinon ka jhagDa tha gar ye rahta

kyun na hota

ki har baDi qaum kaam aise kiya hi karti hai jo ki tariKH ke liye bab kholte hain

ye kar-nama

ye sirf tariKH ka nahin hai

ye kar-nama to hai jughrafiya bhi jis ne badal diya hai

bahut baDi qaum ka ye kartab hai

qaum sui banana apne liye jo tu jaanti nahin hai

ye qaum barud jis ki KHatir baDe mamalik bana rahe hain

bahut baDi qaum hai bahut hi

jahaz ke kar-KHane bairun-e-mulk jis ke bane hue hain

wo jis ki KHatir ki buke impala ford order pe ban rahi hai

mashin engine milon ka saman kar-KHane ke sare auzar

radio telephone telewision tracktor machine-gun top

gharaz ek ek shai us ki us ke kami KHud apne mulkon mein us ki KHatir bana rahe hain

bahut baDi qaum hai ki us ke baDe gharon mein to sar ka shawe bhi

tan ke kapDe bhi aur jute bhi us ke bahar se aa rahe hain

zamin-wietnam

teri maen to apne bachche ke qad ko dekhti hain ki us ki lambai car se to baDi nahin hai

zamin-wietnam

beTiyan teri apne shanon pe apne sheron ka bojh le kar panw ki surat hain istada

magar yahan beTiyan nahin hain

yahan to tohfe hain

jo ki bahar se aae saudagaron ki KHatir tawazoa karne ke waste kar rahe hain

zamin-wietnam

tere beTe to tere waris tere muhafiz hain

fauj wo ban rahe hain teri ki tujh pe jaanen nisar kar den

zamin-wietnam

tere beTe to tere waris tere muhafiz hain

fauj wo ban rahe hain teri ki tujh pe jaanen nisar kar den

yahan pe beTi nahin to beTe bhi is zamin ne nahin jane hain

yahan to tanKHwah ki zarurat hai fauj mein ho ki mauj mein ho

zamin-wietnam

tera aadam kahan se aaya tha

beTiyan teri kaun si be-misal hawwa ki beTiyan hain

zamin-e-wietnam teri miTTi kahan ki hai jo ki

tere dushman ne chand tasKHir kar liya par na tujh ko jita

tera KHuda kaun sa KHuda hai

mere KHuda ka salam us ko

magar mere wietnam jo farq tujh mein mujh mein hai aur thoDa sa dur kar dun

teri laDai to sirf dushman se hai ki jo tere samne hai

meri laDai hai dushmanon se jo samne ho ke bhi mere samne nahin hain

main dushmanon se bhi laD raha hun

mein doston se bhi laD raha hun jo dosti ka libas pahne

meri laDai aDosiyon se paDosiyon se

meri laDai hai apne ghar mein

meri laDai samundaron ke udhar bhi qaem

meri laDai hai jism se bhi

meri laDai hai zehn se bhi

meri laDai to samraji nizam se hai

jahan jahan samraj hai main wahan wahan par Data hua hun

main apni ghurbat se apni mazlumiyat se aagah ho chuka hun

meri ye ghurbat ye meri mazlumiyat hi quwwat hai

wo sipahi nahin hai mera jo apne helmate ke bojh se sar jhuka chuka hai

jo sirf tanKHwah ke liye mera sher jarnail ban gaya hai

mera ye qallash mera be-kar mera mazdur wo sipahi hai

jo meri fauj ban raha hai

zamin ke pallu ko apni is taza fauj ki be-panah quwwat se tham kar

ab main apni jaanib ghasiT lunga

ghasiT lunga main un ko bhi wo jo dusri samt apne aahan ke hath le kar

meri zamin apni samt lalach se khinchte hain

zamin-e-wietnam gar teri sar-zamin pe barud ki tahen bichh gai hain to us zamin

ke kheton mein bhi faqat goliyan ugengi

yahan bhi peDon ko ab phalon ki bajae bam hi lagenge

is sar-zamin pe bhi aag hi ke dariya bahenge

jin main ki koi kaghaz ki naw wo samraj ki ho ki meri apni

na chal sakegi

zamin-e-wietnam main bhi ek sar-zamin ka basi hun

is zamin ka salam tujh ko