muraqqa-e-ibrat

jalva-e-husn-e-azal aa.e tasavvur meñ agar

gosha-e-dil meñ machalte hue armāñ hoñge

ik hasīñ gor-e-ġharībāñ pe huā yuuñ goyā

ye bhī kambaḳht kabhī hazrat-e-insāñ hoñge

paañv rakhte bhī nazākat se agar hoñge kahīñ

be-badal husn-e-jahāñ-soz pe nāzāñ hoñge

phuul bistar pe bichhāne ko agar hāsil the

sair ke vāste baaġh aur gulistāñ hoñge

itr malne ke liye kapḌe badalne ke liye

mahl-o-aivāñ meñ bahut dast-e-hasīnāñ hoñge

nit-na.ī roz mayassar thī unheñ bazm-e-surūd

dil bahalne ke liye saiñkaḌoñ sāmāñ hoñge

ek lamha bhī guzartā thā jo tanhā.ī meñ

muztarib aur pareshān ye zīshāñ hoñge

gor-o-marqad pe yūñhī sair ko aate hoñge

aur sīnoñ meñ liye hasrat-o-armāñ hoñge

kyā ḳhabar thī ki ujaḌ jā.egā gulzār-e-hayāt

ek jhoñke se havā ke na ye sāmāñ hoñge

kyā yūñhī maut miTā.egī jahāñ se ham ko

kyā yūñhī apne liye dasht-o-bayābāñ hoñge

zindagī meñ na kareñge jo bashar kār-e-savāb

vaqt-e-ruḳhsat vo pareshān-o-pashemāñ hoñge

'āftāb' un kī samajhtā huuñ hayāt-e-abadī

jo bashar dharm pe sau-jān se qurbāñ hoñge

jalwa-e-husn-e-azal aae tasawwur mein agar

gosha-e-dil mein machalte hue arman honge

ek hasin gor-e-ghariban pe hua yun goya

ye bhi kambaKHt kabhi hazrat-e-insan honge

panw rakhte bhi nazakat se agar honge kahin

be-badal husn-e-jahan-soz pe nazan honge

phul bistar pe bichhane ko agar hasil the

sair ke waste bagh aur gulistan honge

itr malne ke liye kapDe badalne ke liye

mahl-o-aiwan mein bahut dast-e-hasinan honge

nit-nai roz mayassar thi unhen bazm-e-surud

dil bahalne ke liye sainkaDon saman honge

ek lamha bhi guzarta tha jo tanhai mein

muztarib aur pareshan ye zishan honge

gor-o-marqad pe yunhi sair ko aate honge

aur sinon mein liye hasrat-o-arman honge

kya KHabar thi ki ujaD jaega gulzar-e-hayat

ek jhonke se hawa ke na ye saman honge

kya yunhi maut miTaegi jahan se hum ko

kya yunhi apne liye dasht-o-bayaban honge

zindagi mein na karenge jo bashar kar-e-sawab

waqt-e-ruKHsat wo pareshan-o-pasheman honge

'aftab' un ki samajhta hun hayat-e-abadi

jo bashar dharm pe sau-jaan se qurban honge