murda logon ki taswiri numaish

jab masjidoñ aur imām-bārgāhoñ meñ

naqab lagā.ī jaatī thī

to ka.ī be-rañg dā.ere savāliya nishān liye

hamāre rāste meñ aa khaḌe hote

ki kalīsāoñ aur mandiroñ kā nizām kaun se ḳhudā ke paas hai

jo amn kī fāḳhtāoñ ko

ibādat-gāh ke raushan-dānoñ meñ bhej detā hai

isī savāl meñ javābī rañg bharne ke liye

ham ne lahhū ko bārūd meñ ghol kar insāniyat kā bharam gañvā liyā

ab kisī bhī naam kā jañgal pukāre

maut par phailā ke nāchtī hai

aur ham duā.iyā hāthoñ meñ qabr khodne ke liye

zamīn DhūñDte hue

apne jismoñ meñ dafn ḳhairātī sāñsoñ pe paltī

zindagī ke gaz nāpte haiñ

ham siyāh laboñ se niklī hui bad-duāoñ kā

vaqt-e-qubūliyat haiñ

isī liye to nishāna-bāz maut hameñ

ibādat-gāhoñ meñ bhī DhūñDh letī hai

ham muTThī bhar log tumhāre TukḌoñ pe palne aa ga.e

to tumhārī ta.affun ugaltī galiyoñ ne

rozgār pe lagā diyā

rizq to kūḌā-karkaT ke Dher se bhī mil jaatā hai

magar vo udhḌe hue adh-jale jism

kahāñ talāsh kareñ

jo ḳhudā se muzākarāt karne ga.e the

aur TukḌoñ kī sūrat kalīsāoñ kī saffāk dīvāroñ pe

chaspāñ kar diye ga.e

aur ham jahannam-rasīda log al-vidā.ī shaam kī

ḳhaak phāñkne aa.e haiñ

ki sunā thā shahar meñ phir se

bikhre hue chehroñ kī numā.ish hai

jab masjidon aur imam-bargahon mein

naqab lagai jati thi

to kai be-rang daere sawaliya nishan liye

hamare raste mein aa khaDe hote

ki kalisaon aur mandiron ka nizam kaun se KHuda ke pas hai

jo amn ki faKHtaon ko

ibaadat-gah ke raushan-danon mein bhej deta hai

isi sawal mein jawabi rang bharne ke liye

hum ne lahhu ko barud mein ghol kar insaniyat ka bharam ganwa liya

ab kisi bhi nam ka jangal pukare

maut par phaila ke nachti hai

aur hum duaiya hathon mein qabr khodne ke liye

zamin DhunDte hue

apne jismon mein dafn KHairaati sanson pe palti

zindagi ke gaz napte hain

hum siyah labon se nikli hui bad-duaon ka

waqt-e-qubuliyat hain

isi liye to nishana-baz maut hamein

ibaadat-gahon mein bhi DhunDh leti hai

hum muTThi bhar log tumhaare TukDon pe palne aa gae

to tumhaari taffun ugalti galiyon ne

rozgar pe laga diya

rizq to kuDa-karkaT ke Dher se bhi mil jata hai

magar wo udhDe hue adh-jale jism

kahan talash karen

jo KHuda se muzakaraat karne gae the

aur TukDon ki surat kalisaon ki saffak diwaron pe

chaspan kar diye gae

aur hum jahannam-rasida log al-widai sham ki

KHak phankne aae hain

ki suna tha shahar mein phir se

bikhre hue chehron ki numaish hai