musafir

musāfir yūñhī giit gaa.e chalā jā

sar-e-rahguzar kuchh sunā.e chalā jā

tirī zindagī soz-o-sāz-e-mohabbat

hañsā.e chalā jā rulā.e chalā jā

tire zamzame haiñ ḳhunuk bhī tapāñ bhī

lagā.e chalā jā bujhā.e chalā jā

koī laakh roke koī laakh Toke

qadam apne aage baḌhā.e chalā jā

hasīñ bhī tujhe rāste meñ mileñge

nazar mat milā muskurā.e chalā jā

mohabbat ke naqshe tamannā ke ḳhāke

banā.e chalā jā miTā.e chalā jā

qadāmat hadeñ khīñchtī hī rahegī

qadāmat kī buniyād Dhaa.e chalā jā

qasam shauq kī fitrat-e-muztarib kī

yūñhī nit-na.ī dhun meñ gaa.e chalā jā

jo parcham uThā hī liyā sar-kashī kaa!

use āsmāñ tak uḌaa.e chalā jā

musafir yunhi git gae chala ja

sar-e-rahguzar kuchh sunae chala ja

teri zindagi soz-o-saz-e-mohabbat

hansae chala ja rulae chala ja

tere zamzame hain KHunuk bhi tapan bhi

lagae chala ja bujhae chala ja

koi lakh roke koi lakh Toke

qadam apne aage baDhae chala ja

hasin bhi tujhe raste mein milenge

nazar mat mila muskurae chala ja

mohabbat ke naqshe tamanna ke KHake

banae chala ja miTae chala ja

qadamat haden khinchti hi rahegi

qadamat ki buniyaad Dhae chala ja

qasam shauq ki fitrat-e-muztarib ki

yunhi nit-nai dhun mein gae chala ja

jo parcham uTha hi liya sar-kashi ka!

use aasman tak uDae chala ja