musafir-e-shab

sukūt-e-shab kī hai jalva-faroshī

hai maujūdāt par chhā.ī ḳhamoshī

fazā-e-shām ko niiñd aa rahī hai

manāzir par siyāhī chhā rahī hai

hai badlā rañg din ke shor-o-shar kā

huā tārīkiyoñ kā daur-daurā

rukā hañgāma-hā-e-din kā mahshar

baḌhā shab kā sakūñ-bar-dosh manzar

hai āḳhir roz-e-raushan kī kahānī

huī tārīk burd-e-āsmānī

gayā rāhat-kade meñ mahr-e-tābāñ

hue anvār ātish-bār-e-pinhāñ

hai tārīkī payām-e-ḳhvāb-noshīñ

ḳhamoshī hai naved-e-rañg-e-taskīñ

faza-e-ġharb hai paiġhām-e-rāhat

ufaq kī ḳhāmushī ilhām-e-rāhat

hai rañgīnī fazā kī kaif ishrat

shafaq kī surḳhiyāñ sāmān-e-farhat

havāoñ meñ bhare haiñ naġhma-e-shab

hai rāhat-zā rabāb-e-zaḳhm-e-shab

huā raushan nigār-e-shab kā jalva

haiñ tanvīreñ falak par kār-farmā

sitāroñ kī tabassum-bāriyoñ meñ

kavākib kī munavvar dhāriyoñ meñ

sutūr-e-kahkashāñ kī laġhzishoñ meñ

surayyā kī majalla tābishoñ meñ

fazā-e-sīm ārā-e-falak meñ

ufuq kī raushan-o-zarrīñ jhalak meñ

ziyā-afroz hai māh-e-daraḳhshāñ

laboñ kī tābisheñ haiñ ḳhanda-afshāñ

faza-e-āsmānī rah-guzar hai

musāfir raat kā garm-e-safar hai

siyāhī shab kī hai hamrāz-o-hamdam

sukūt-e-shām hai dam-sāz o mahram

hai tanhā.ī se rasm-e-āshnā.ī

ḳhayāl-e-mā-sivā se be-niyāzī

safar kī kaifiyat madd-e-nazar hai

ki taḳh.īl-e-safar lutf-e-safar hai

ḳhabar hī kuchh nahīñ hadd-e-safar kī

na kuchh parvāh tūl-e-rah-guzar kī

ḳhamosh o mutma.in hai jāda-paimā

jabīñ par istaqāmat jalva-farmā

sukūt-e-shab meñ jo yuuñ sargirāñ hai

mah-e-kāmil tirī manzil kahāñ hai

tirī rahbar ufaq kī ḳhāmushī hai

aniis o ham-safar ik chāñdnī hai

kamāl-e-zīst terī justujū hai

ye tarz-e-sa.ī hadd-e-ābrū hai

sabaq-āmoz terī dāstāñ hai

tujhe hāsil kamāl-e-kāmrāñ hai

tirī sa.i-e-amal lā-intihā hai

abad tak is safar kā silsila hai

sukut-e-shab ki hai jalwa-faroshi

hai maujudat par chhai KHamoshi

faza-e-sham ko nind aa rahi hai

manazir par siyahi chha rahi hai

hai badla rang din ke shor-o-shar ka

hua tarikiyon ka daur-daura

ruka hangama-ha-e-din ka mahshar

baDha shab ka sakun-bar-dosh manzar

hai aaKHir roz-e-raushan ki kahani

hui tarik burd-e-asmani

gaya rahat-kade mein mahr-e-taban

hue anwar aatish-bar-e-pinhan

hai tariki payam-e-KHwab-noshin

KHamoshi hai nawed-e-rang-e-taskin

faza-e-gharb hai paigham-e-rahat

ufaq ki KHamushi ilham-e-rahat

hai rangini faza ki kaif ishrat

shafaq ki surKHiyan saman-e-farhat

hawaon mein bhare hain naghma-e-shab

hai rahat-za rabab-e-zaKHm-e-shab

hua raushan nigar-e-shab ka jalwa

hain tanwiren falak par kar-farma

sitaron ki tabassum-bariyon mein

kawakib ki munawwar dhaariyon mein

sutur-e-kahkashan ki laghzishon mein

surayya ki majalla tabishon mein

faza-e-sim aara-e-falak mein

ufuq ki raushan-o-zarrin jhalak mein

ziya-afroz hai mah-e-daraKHshan

labon ki tabishen hain KHanda-afshan

faza-e-asmani rah-guzar hai

musafir raat ka garm-e-safar hai

siyahi shab ki hai hamraaz-o-hamdam

sukut-e-sham hai dam-saz o mahram

hai tanhai se rasm-e-ashnai

KHayal-e-ma-siwa se be-niyazi

safar ki kaifiyat madd-e-nazar hai

ki taKHil-e-safar lutf-e-safar hai

KHabar hi kuchh nahin hadd-e-safar ki

na kuchh parwah tul-e-rah-guzar ki

KHamosh o mutmain hai jada-paima

jabin par istaqamat jalwa-farma

sukut-e-shab mein jo yun sargiran hai

mah-e-kaamil teri manzil kahan hai

teri rahbar ufaq ki KHamushi hai

anis o ham-safar ek chandni hai

kamal-e-zist teri justuju hai

ye tarz-e-sai hadd-e-abru hai

sabaq-amoz teri dastan hai

tujhe hasil kamal-e-kaamran hai

teri sai-e-amal la-intiha hai

abad tak is safar ka silsila hai