mushaera

mushā.ere meñ jo shā.er bulā.e jaate haiñ

baḌe salīqe se būdam banā.e jaate haiñ

vasūl hote haiñ pahle ye nāma-o-paiġhām

ki ai shahanshah-e-aqlīm-e-'hāfiz'-o-'ḳhayyām'

hamārī bazm-e-adab kā hai jashn-e-sālāna

jalī hai sham-e-suḳhan raqs meñ hai parvāna

ghaTā jo sheroñ kī chāroñ taraf se aa.ī hai

vo film ke bhī sitāre sameT laa.ī hai

guzishta saal sunā jis ne aap ko ye kahā

na sho.ale meñ ye karishma, na barq meñ adā

aur ab ke saal bhī ḳhud dekh leñge ye sarkār

ki gūñjte haiñ aqīdat se kūcha-o-bāzār

ravāna kar deñ kirā.e kī gar zarūrat hai

''vo aa.eñ ghar meñ hamāre ḳhudā kī qudrat hai''

hamāre shahr meñ urdu adab kā dañggal hai

ye shahar sher kā aur shā.eroñ kā jañgal hai

ab is pe shā.er-e-shīrīñ-navā ko hai ye gumāñ

ki mere sho.ale se raushan huī hai sham.a-e-bayāñ

idhar se muntazim ik soch aur bichār meñ hai

use ḳhabar hai ki shā.er kis intizār meñ hai

bulāne ke liye isrār bhī vo kartā hai

kirāya le ki na phir aa.e is se Dartā hai

banā ke likhtā hai dāvat kā is tarah maktūb

mushā.ere meñ diyā jā.egā jo hai matlūb

ġharaz bulāte haiñ vo shā.eroñ ko hiile se

payām aate haiñ ahbāb ke vasīle se

jo sher sunñe ko apne gharoñ se aate haiñ

vo sab baTer laḌāne kā lutf uThāte haiñ

vo jānte haiñ ki shā.er hai ek murġh-e-ajīb

agar galā hai to shā.er, nahīñ galā to adiib

ye sochtā hai chalo qismat aazmā dekheñ

sulūk hotā hai auroñ ke saath kyā dekheñ

bahut se aur bhī shā.er vahāñ par ā.eñge

chalo ki marg-e-raqībāñ kā lutf uThā.eñge

haiñ kuchh pale hue shā.er kuchh in meñ ḳhud-rav haiñ

purāne ghaag haiñ kuchh in meñ shā.er-e-nau haiñ

vo dīdanī hai agar ho kuchh in meñ hañgāma

ki is akhāḌe kā har pahlvāñ hai allāma

satāte rahte haiñ shā.er ko aise andeshe

yahāñ talak ki nikal aa.eñ rishte aur reshe

ta.alluqāt se āḳhir ko ho ke vo majbūr

mushā.ere ko chalā jaise kaam par mazdūr

kisī se qarz liyā aur kisī kī minnat kī

ġharaz ki shā.er-e-ātish-navā ne rahlat kī

phañsā hai is liye phande meñ shā.er-e-sāda

ki muntazim bhī the hushiyār ye bhī āmāda

vo aa gayā hai uThā kar hazār dushvārī

chale jilau meñ use le ke us ke darbārī

kisī ke haath meñ paan aur kisī ke haath meñ haar

har ik ye kahtā hai zahmat bahut huī sarkār

mushā.ere meñ qadam-ranja aap farmā.eñ

to ahl-e-zauq nashistoñ meñ aa ke bhar jaa.eñ

taḌap rahe the jo sunñe ke vāste ash.ār

mushā.ere ke liye un ke paas haiñ darkār

ticket ḳharīd ke jo ahl-e-zauq aa.e haiñ

vo āḳhirī safoñ meñ ḳhud-baḳhud samā.e haiñ

moazzezīn jo zauq-e-adab se ḳhālī haiñ

reserve un ke liye aglī saf karā lī haiñ

ye is liye ki nazar meñ vo aap kī bhī raheñ

jo sher vo na samajh paa.eñ aap vo na paḌheñ

mushā.ere meñ ḳhvātīn buntī haiñ sweater

sambhal ke baiThe haiñ shā.er kī taak meñ hōter

paḌhā mushā.era shā.er ne ehtimām ke saath

ġhazal sunā.ī tarannum kī dhūm-dhām ke saath

kisī ne vaah kahā aur kisī ne huuT kiyā

mushā.ere ko ye samjhā ki maiñ ne luuT liyā

isī pe phūlā huā hai vāh-vāh huī

tamām raat kaTī niiñd bhī tabāh huī

ye mahfil aa hī ga.ī roz-o-shab kī sarhad par

janāb-e-sadr bhī ab so chuke haiñ masnad par

jo sāma.īn haiñ un par bhī niiñd taarī hai

savārī us ko milī jis pe fazl-e-bārī hai

jo muntazim the sitāroñ ke saath Duub ga.e

ga.e vo shā.eroñ se chhup ke aur ḳhuub ga.e

numūd-e-sub.h se jab muntashir huī mahfil

akelā rah gayā shā.er ġharīb-e-shahr o ḳhajil

mushā.era ba-juz andāz-e-hāv-hū kyā hai

''tumhāre shahar meñ 'ġhālib' kī aabrū kyā hai''

mushaere mein jo shaer bulae jate hain

baDe saliqe se budam banae jate hain

wasul hote hain pahle ye nama-o-paigham

ki ai shahanshah-e-aqlim-e-'hafiz'-o-'KHayyam'

hamari bazm-e-adab ka hai jashn-e-salana

jali hai sham-e-suKHan raqs mein hai parwana

ghaTa jo sheron ki chaaron taraf se aai hai

wo film ke bhi sitare sameT lai hai

guzishta sal suna jis ne aap ko ye kaha

na shoale mein ye karishma, na barq mein ada

aur ab ke sal bhi KHud dekh lenge ye sarkar

ki gunjte hain aqidat se kucha-o-bazar

rawana kar den kirae ki gar zarurat hai

wo aaen ghar mein hamare KHuda ki qudrat hai

hamare shahr mein urdu adab ka danggal hai

ye shahar sher ka aur shaeron ka jangal hai

ab is pe shaer-e-shirin-nawa ko hai ye guman

ki mere shoale se raushan hui hai shama-e-bayan

idhar se muntazim ek soch aur bichaar mein hai

use KHabar hai ki shaer kis intizar mein hai

bulane ke liye israr bhi wo karta hai

kiraya le ki na phir aae is se Darta hai

bana ke likhta hai dawat ka is tarah maktub

mushaere mein diya jaega jo hai matlub

gharaz bulate hain wo shaeron ko hile se

payam aate hain ahbab ke wasile se

jo sher sunne ko apne gharon se aate hain

wo sab baTer laDane ka lutf uThate hain

wo jaante hain ki shaer hai ek murgh-e-ajib

agar gala hai to shaer, nahin gala to adib

ye sochta hai chalo qismat aazma dekhen

suluk hota hai auron ke sath kya dekhen

bahut se aur bhi shaer wahan par aaenge

chalo ki marg-e-raqiban ka lutf uThaenge

hain kuchh pale hue shaer kuchh in mein KHud-raw hain

purane ghag hain kuchh in mein shaer-e-nau hain

wo didani hai agar ho kuchh in mein hangama

ki is akhaDe ka har pahlwan hai allama

satate rahte hain shaer ko aise andeshe

yahan talak ki nikal aaen rishte aur reshe

talluqat se aaKHir ko ho ke wo majbur

mushaere ko chala jaise kaam par mazdur

kisi se qarz liya aur kisi ki minnat ki

gharaz ki shaer-e-atish-nawa ne rahlat ki

phansa hai is liye phande mein shaer-e-sada

ki muntazim bhi the hushiyar ye bhi aamada

wo aa gaya hai uTha kar hazar dushwari

chale jilau mein use le ke us ke darbari

kisi ke hath mein pan aur kisi ke hath mein haar

har ek ye kahta hai zahmat bahut hui sarkar

mushaere mein qadam-ranja aap farmaen

to ahl-e-zauq nashiston mein aa ke bhar jaen

taDap rahe the jo sunne ke waste ashaar

mushaere ke liye un ke pas hain darkar

ticket KHarid ke jo ahl-e-zauq aae hain

wo aaKHiri safon mein KHud-baKHud samae hain

moazzezin jo zauq-e-adab se KHali hain

reserwe un ke liye agli saf kara li hain

ye is liye ki nazar mein wo aap ki bhi rahen

jo sher wo na samajh paen aap wo na paDhen

mushaere mein KHwatin bunti hain sweater

sambhal ke baiThe hain shaer ki tak mein hooter

paDha mushaera shaer ne ehtimam ke sath

ghazal sunai tarannum ki dhum-dham ke sath

kisi ne wah kaha aur kisi ne huT kiya

mushaere ko ye samjha ki main ne luT liya

isi pe phula hua hai wah-wah hui

tamam raat kaTi nind bhi tabah hui

ye mahfil aa hi gai roz-o-shab ki sarhad par

janab-e-sadr bhi ab so chuke hain masnad par

jo samain hain un par bhi nind tari hai

sawari us ko mili jis pe fazl-e-bari hai

jo muntazim the sitaron ke sath Dub gae

gae wo shaeron se chhup ke aur KHub gae

numud-e-subh se jab muntashir hui mahfil

akela rah gaya shaer gharib-e-shahr o KHajil

mushaera ba-juz andaz-e-haw-hu kya hai

tumhaare shahar mein 'ghaalib' ki aabru kya hai