mushtarka KHwab ki qabr par

raat terī mirī ārzūoñ kā maskan ye raat

ghuur kaalī siyah bādaloñ se aTī

tere mere gunāhoñ savāboñ

savāloñ javāboñ se aarī ye raat

ḳhuun kī hiddatoñ meñ dahaktī huī

saare ḳhvāboñ kā īñdhan banātī huī

ratjagoñ kī chitā

jo tirī merī āñkhoñ meñ bhaḌkī

bhaḌak ke bujhī

saarī umroñ ke dukh

aatī jaatī har ik saañs meñ haiñ sambhāle hue

saañs jo aas kī dostī ko bhulā bhī chukī

dhīre dhīre simaTtī huī

kin yugoñ par nazar ko jamā.e hue

barf hone lagī

raat va.ade sabhī asal ke

jo na puure hue

kyuuñ kiye

kor āñkheñ bhikārī banī haiñ

mujassam savālī banī haiñ

ḳhamoshī kā kaasa liye

vasl kī rezgārī ke haiñ muntazir

chhan chhanan

koī āvāz koī bhī

ḳhushiyoñ ke sakūñ se labrez āvāz

āñkheñ sunīñ

kaise lekin sunīñ

surma.ī shaam apnā labāda badal bhī chukī

raat aa.ī

ye Dolī nahīñ kuchh janāze uThā.e hue

saare va.ade bhulā.e hue

shahr-e-afsos

ek mātam lahū kī ravānī meñ hai

raakh hī raakh āñkhoñ ke paanī meñ hai

raat teri meri aarzuon ka maskan ye raat

ghur kali siyah baadalon se aTi

tere mere gunahon sawabon

sawalon jawabon se aari ye raat

KHun ki hiddaton mein dahakti hui

sare KHwabon ka indhan banati hui

ratjagon ki chita

jo teri meri aankhon mein bhaDki

bhaDak ke bujhi

sari umron ke dukh

aati jati har ek sans mein hain sambhaale hue

sans jo aas ki dosti ko bhula bhi chuki

dhire dhire simaTti hui

kin yugon par nazar ko jamae hue

barf hone lagi

raat wade sabhi asal ke

jo na pure hue

kyun kiye

kor aankhen bhikari bani hain

mujassam sawali bani hain

KHamoshi ka kasa liye

wasl ki rezgari ke hain muntazir

chhan chhanan

koi aawaz koi bhi

KHushiyon ke sakun se labrez aawaz

aankhen sunin

kaise lekin sunin

surmai sham apna labaada badal bhi chuki

raat aai

ye Doli nahin kuchh janaze uThae hue

sare wade bhulae hue

shahr-e-afsos

ek matam lahu ki rawani mein hai

rakh hi rakh aankhon ke pani mein hai