muslim-league

log kahte haiñ ki āmāda-e-islāh hai league

ye agar sach hai to ham ko bhī koī jañg nahīñ

seġha-e-rāz se kuchh kuchh ye bhanak aatī hai

ki ham-āhañgi-e-ahbāb se ab nañg nahīñ

farq itnā to ba-zāhir nazar aatā hai zarūr

ab ḳhushāmad kā har ik baat meñ vo rañg nahīñ

arz-e-matlab meñ zabāñ kuchh to hai khultī jaatī

garche ab tak bhī harīfoñ se ham-āhañg nahīñ

vo bhī ab naqd-e-hukūmat ko parakhte haiñ zarūr

jin ko ab tak bhī tamīz-e-guhar-o-sañg nahīñ

qaum meñ phūñkte rahte haiñ jo afsūn-e-vafā

un kī afsāna-tarāzī kā bhī vo Dhañg nahīñ

vo bhī kahte haiñ ki is jins-e-vafā kī qīmat

jis qadar miltī hai zarre ke bhī ham sañg nahīñ

aage the halqa-e-taqlīd meñ jo log asiir

sust-raftār to ab bhī haiñ magar lañg nahīñ

aap liberal jo nahīñ haiñ to balā se na sahī

yaañ kisī ko talab-e-afsar-o-aurañg nahīñ

kaam karne ke bahut se haiñ jo karnā chāheñ

ab bhī ye dā.era-e-sa.i-o-amal tañg nahīñ

saal meñ ye jo tamāshā sā huā kartā hai

kaam karne kā ye andāz nahīñ Dhañg nahīñ

kuchh to nazm-o-nasq-e-mulk meñ bhī dījiye daḳhl

sheva-e-haq-talabī hai ye koī jañg nahīñ

kuchh na kuchh nazm-e-hukūmat meñ hai islāh zarūr

ham na māneñge ki is ā.īna meñ zañg nahīñ

kam se kam hakim-e-izlā to hoñ ahl-e-vatan

kyā hazāroñ meñ koī sāhib-e-farhañg nahīñ

log kahte hain ki aamada-e-islah hai league

ye agar sach hai to hum ko bhi koi jang nahin

segha-e-raaz se kuchh kuchh ye bhanak aati hai

ki ham-ahangi-e-ahbab se ab nang nahin

farq itna to ba-zahir nazar aata hai zarur

ab KHushamad ka har ek baat mein wo rang nahin

arz-e-matlab mein zaban kuchh to hai khulti jati

garche ab tak bhi harifon se ham-ahang nahin

wo bhi ab naqd-e-hukumat ko parakhte hain zarur

jin ko ab tak bhi tamiz-e-guhar-o-sang nahin

qaum mein phunkte rahte hain jo afsun-e-wafa

un ki afsana-taraazi ka bhi wo Dhang nahin

wo bhi kahte hain ki is jins-e-wafa ki qimat

jis qadar milti hai zarre ke bhi hum sang nahin

aage the halqa-e-taqlid mein jo log asir

sust-raftar to ab bhi hain magar lang nahin

aap liberal jo nahin hain to bala se na sahi

yan kisi ko talab-e-afsar-o-aurang nahin

kaam karne ke bahut se hain jo karna chahen

ab bhi ye daera-e-sai-o-amal tang nahin

sal mein ye jo tamasha sa hua karta hai

kaam karne ka ye andaz nahin Dhang nahin

kuchh to nazm-o-nasq-e-mulk mein bhi dijiye daKHl

shewa-e-haq-talabi hai ye koi jang nahin

kuchh na kuchh nazm-e-hukumat mein hai islah zarur

hum na manenge ki is aaina mein zang nahin

kam se kam hakim-e-izla to hon ahl-e-watan

kya hazaron mein koi sahib-e-farhang nahin