muslim umma ka America se shikwa

kyuuñ gunahgār banūñ visa-farāmosh rahūñ

kab talak ḳhauf-zada sūrat-e-ḳhargosh rahūñ

vaqt kā ye bhī taqāza hai ki ḳhāmosh rahūñ

ham-navā! maiñ koī mujrim huuñ ki rū-posh rahūñ

shikva america se ḳhākam-ba-dahan hai mujh ko

chūñki is mulk kā sahrā bhī chaman hai mujh ko

gar tire shahr meñ aa.e haiñ to ma.azūr haiñ ham

vaqt kā bojh uThā.e hue mazdūr haiñ ham

ek hī job pe muddat se ba-dastūr haiñ ham

'bush' se nazdīk 'musharraf' se bahut duur haiñ ham

U.S.A shikva-e-arbāb-e-vafā bhī sun le

tālib-e-aiD se thoḌā sā gila bhī sun le

terā parcham sar-e-aflāk uḌāyā kis ne

tere qānūn ko siine se lagāyā kis ne

har senator ko election meñ jitāyā kis ne

fund-rasing kī mahāfil ko sajāyā kis ne

'hilary' se kabhī pūchho kabhī chak-schumer se

har senator ko navāzā hai yahāñ dollar se

jackson-heights kī galiyoñ ko basāyā ham ne

coney-island kī zīnat ko baḌhāyā ham ne

goriyoñ hī se nahīñ ishq laḌāyā ham ne

kāliyoñ se bhī yahāñ aqd rachāyā ham ne

aa ke is mulk meñ rishte hī faqat joḌe haiñ

bam to kyā ham ne paTāḳhe bhī nahīñ chhoḌe haiñ

jab burā vaqt paḌā ham ne sambhālī masjid

kab talak rahtī musalmān se ḳhālī masjid

jab huī ghar se bahut duur bilālī masjid

ham ne ''tah-ḳhāne'' meñ chhoTī sī banā lī masjid

ham ne kyā jurm kiyā apnī ibādat ke liye

sirf mīlād kiyā jashn-e-vilādat ke liye

ham ne rakkhī hai yahāñ amn-o-amāñ kī buniyād

apnī fitrat meñ nahīñ dahshat o dañgā o fasād

har musalmān pe U.S.A meñ paḌī hai uftād

phir bhī ham ne tire shahroñ ko kiyā hai ābād

tujh se iqrār-e-mohabbat kī sazā paa.ī hai

ham ne is mulk meñ jhaTke kī chikan khaa.ī hai

gir gayā tez havāoñ se agar tayyāra

pakḌā jaatā hai musalmān yahāñ be-chārā

kabhī ghūrā kabhī taaḌā to kabhī lalkārā

kabhī subway se uThāyā kabhī chhāpa maarā

tū ne ye kah ke jahāzoñ ko karachi bhejā

ye bhī shaklan hai musalmān ise bhī le jā

ham musalmān haiñ dahshat ke ravādār nahīñ

kisī ḳhitte ke bhī insān se bezār nahīñ

qatl aur ḳhuuñ kī siyāsat ke taraf-dār nahīñ

dāfe-e-jañg faqat phuul haiñ talvār nahīñ

ham yahāñ amn ke haamī haiñ tujhe fikr nahīñ

mere qur.ān meñ dahshat kā kahīñ zikr nahīñ

media terā davāt aur qalam tere haiñ

jitne bhī mulk haiñ dollar kī qasam tere haiñ

ye shahanshāh ye arbāb-e-haram tere haiñ

kaash tujh ko yaqīñ aa jaa.e ki ham tere haiñ

tū ne jab bhī kabhī māñgā hai tujhe tel diyā

tujh ko jab mauqa.a lagā tū ne hameñ bel diyā

hālat-e-jañg meñ ham log tire saath rahe

taaki duniyā kī qayādat meñ tirī baat rahe

aur musalmān hī mahrūm-e-ināyāt rahe

kuchh to diport hue nazr-e-havālāt rahe

ham tire sab se baḌe halqa-e-ahbāb meñ haiñ

phir bhī tūfāñ se nikalte nahīñ girdāb meñ haiñ

''aiD'' meñ terī ajab ma.arka-ārā.ī hai

maut ke saaz meñ lipTī huī shahnā.ī hai

aslaha de ke jo dushman kī pazīrā.ī hai

ham vafādār nahīñ tū bhī to harjā.ī hai

rahmateñ haiñ tirī aġhyār ke kāshānoñ par

chhāpa paḌtā hai to bechāre musalmānoñ par

kyun gunahgar banun wisa-faramosh rahun

kab talak KHauf-zada surat-e-KHargosh rahun

waqt ka ye bhi taqaza hai ki KHamosh rahun

ham-nawa! main koi mujrim hun ki ru-posh rahun

shikwa america se KHakam-ba-dahan hai mujh ko

chunki is mulk ka sahra bhi chaman hai mujh ko

gar tere shahr mein aae hain to mazur hain hum

waqt ka bojh uThae hue mazdur hain hum

ek hi job pe muddat se ba-dastur hain hum

'bush' se nazdik 'musharraf' se bahut dur hain hum

USA shikwa-e-arbab-e-wafa bhi sun le

talib-e-aiD se thoDa sa gila bhi sun le

tera parcham sar-e-aflak uDaya kis ne

tere qanun ko sine se lagaya kis ne

har senator ko election mein jitaya kis ne

fund-rasing ki mahafil ko sajaya kis ne

'hilary' se kabhi puchho kabhi chak-schumer se

har senator ko nawaza hai yahan dollar se

jackson-heights ki galiyon ko basaya hum ne

coney-island ki zinat ko baDhaya hum ne

goriyon hi se nahin ishq laDaya hum ne

kaliyon se bhi yahan aqd rachaya hum ne

aa ke is mulk mein rishte hi faqat joDe hain

bam to kya hum ne paTaKHe bhi nahin chhoDe hain

jab bura waqt paDa hum ne sambhaali masjid

kab talak rahti musalman se KHali masjid

jab hui ghar se bahut dur bilali masjid

hum ne tah-KHane mein chhoTi si bana li masjid

hum ne kya jurm kiya apni ibaadat ke liye

sirf milad kiya jashn-e-wiladat ke liye

hum ne rakkhi hai yahan amn-o-aman ki buniyaad

apni fitrat mein nahin dahshat o danga o fasad

har musalman pe USA mein paDi hai uftad

phir bhi hum ne tere shahron ko kiya hai aabaad

tujh se iqrar-e-mohabbat ki saza pai hai

hum ne is mulk mein jhaTke ki chikan khai hai

gir gaya tez hawaon se agar tayyara

pakDa jata hai musalman yahan be-chaara

kabhi ghura kabhi taDa to kabhi lalkara

kabhi subway se uThaya kabhi chhapa mara

tu ne ye kah ke jahazon ko karachi bheja

ye bhi shaklan hai musalman ise bhi le ja

hum musalman hain dahshat ke rawadar nahin

kisi KHitte ke bhi insan se bezar nahin

qatl aur KHun ki siyasat ke taraf-dar nahin

dafe-e-jang faqat phul hain talwar nahin

hum yahan amn ke hami hain tujhe fikr nahin

mere quran mein dahshat ka kahin zikr nahin

media tera dawat aur qalam tere hain

jitne bhi mulk hain dollar ki qasam tere hain

ye shahanshah ye arbab-e-haram tere hain

kash tujh ko yaqin aa jae ki hum tere hain

tu ne jab bhi kabhi manga hai tujhe tel diya

tujh ko jab mauqa laga tu ne hamein bel diya

haalat-e-jang mein hum log tere sath rahe

taki duniya ki qayaadat mein teri baat rahe

aur musalman hi mahrum-e-inayat rahe

kuchh to diport hue nazr-e-hawalat rahe

hum tere sab se baDe halqa-e-ahbab mein hain

phir bhi tufan se nikalte nahin girdab mein hain

aiD mein teri ajab marka-arai hai

maut ke saz mein lipTi hui shahnai hai

aslaha de ke jo dushman ki pazirai hai

hum wafadar nahin tu bhi to harjai hai

rahmaten hain teri aghyar ke kashanon par

chhapa paDta hai to bechaare musalmanon par