muslim uniwersity aligarh se KHitab

ai aligarh ai javāñ-qismat dabistān-e-kuhan

aql ke fānūs se raushan hai terī anjuman

hashr ke din tak phalā-phūlā rahe terā chaman

tere paimānoñ meñ larzāñ hai sharāb-e-ilm-o-fan

rūh-e-'sir-sayyad' se raushan terā mai-ḳhāna rahe

rahtī duniyā tak tirā gardish meñ paimāna rahe

ek din ham bhī tirī āñkhoñ ke bīmāroñ meñ the

terī zulf-e-ḳham najam ke nau-giraftāroñ meñ the

terī jins-e-ilm-parvar ke ḳharīdāroñ meñ the

jān-o-dil se tere jalvoñ ke parastāroñ meñ the

mauj-e-kausar thā tirā sail-e-adā apne liye

āb-e-haivāñ thī terī āb-o-havā apne liye

ilm kā pahlā sabaq tū ne paḌhāyā thā hameñ

kis tarah jiite haiñ tū ne hī batāyā thā hameñ

ḳhvāb se tiflī ke tū ne hī jagāyā thā hameñ

naaz se parvān tū ne hī chaḌhāyā thā hameñ

mausam-e-gul keī ḳhabar terī zabānī aa.ī thī

tere bāġhoñ meñ havā khā kar javānī aa.ī thī

lekin ai ilm-o-jasārat ke daraḳhshāñ āftāb

kuchh ba-alfāz-e-digar bhī tujh se karnā hai ḳhitāb

go ye dhaḌkā hai ki hūñgā murid-e-qahr-o-itāb

kah bhī duuñ jo kuchh hai dil meñ tā-kujā ye pech-o-tāb

ban paḌe jo sa.ī apne se vo karnā chāhiye

mard ko kahne ke mauqa pe na Darnā chāhiye

ai aligarh ai halāk-e-tābish-e-vaz.a-e-farañg

'thames' hai āġhosh meñ tere bajā.e mauj-e-gañg

vādī-e-maġhrib meñ gum hai tere dil keī har umañg

valvaloñ meñ tere shāyad arsa-e-mashriq hai tañg

kab hai maġhrib ka.aba-e-hājat-ravā tere liye

aa ki hai bechain rūh-e-asia tere liye

kushta-e-maġhrib nigār-e-sharq ke abrū bhī dekh

sāz-e-be-rañgī ke juuyā soz-e-rang-o-bū bhī dekh

nargis-e-arzaq ke shaidā dīda-e-āhū bhī dekh

ai sunahrī zulf ke qaidī siyah gesū bhī dekh

kar chukā sair asl markaz par to aanā chāhiye

apne ghar keī samt bhī āñkheñ uThānā chāhiye

puḳhta-kārī siikh ye ā.īn-e-ḳhāmī tā-kujā

jāda-e-afrang par yuuñ tez-gāmī tā-kujā

soch tū jī meñ ye jhūTī nek-nāmī tā-kujā

maġhribī tahzīb kā tauq-e-ġhulāmī tā-kujā

mard agar hai ġhair keī taqlīd karnā chhoḌ de

chhoḌ de lillāh bil-aqsāt marnā chhoḌ de

ai aligarh ai jawan-qismat dabistan-e-kuhan

aql ke fanus se raushan hai teri anjuman

hashr ke din tak phala-phula rahe tera chaman

tere paimanon mein larzan hai sharab-e-ilm-o-fan

ruh-e-'sir-sayyad' se raushan tera mai-KHana rahe

rahti duniya tak tera gardish mein paimana rahe

ek din hum bhi teri aankhon ke bimaron mein the

teri zulf-e-KHam najam ke nau-giraftaron mein the

teri jins-e-ilm-parwar ke KHaridaron mein the

jaan-o-dil se tere jalwon ke parastaron mein the

mauj-e-kausar tha tera sail-e-ada apne liye

aab-e-haiwan thi teri aab-o-hawa apne liye

ilm ka pahla sabaq tu ne paDhaya tha hamein

kis tarah jite hain tu ne hi bataya tha hamein

KHwab se tifli ke tu ne hi jagaya tha hamein

naz se parwan tu ne hi chaDhaya tha hamein

mausam-e-gul kei KHabar teri zabani aai thi

tere baghon mein hawa kha kar jawani aai thi

lekin ai ilm-o-jasarat ke daraKHshan aaftab

kuchh ba-alfaz-e-digar bhi tujh se karna hai KHitab

go ye dhaDka hai ki hunga murid-e-qahr-o-itab

kah bhi dun jo kuchh hai dil mein ta-kuja ye pech-o-tab

ban paDe jo sai apne se wo karna chahiye

mard ko kahne ke mauqa pe na Darna chahiye

ai aligarh ai halak-e-tabish-e-waza-e-farang

'thames' hai aaghosh mein tere bajae mauj-e-gang

wadi-e-maghrib mein gum hai tere dil kei har umang

walwalon mein tere shayad arsa-e-mashriq hai tang

kab hai maghrib kaba-e-hajat-rawa tere liye

aa ki hai bechain ruh-e-asia tere liye

kushta-e-maghrib nigar-e-sharq ke abru bhi dekh

saz-e-be-rangi ke juya soz-e-rang-o-bu bhi dekh

nargis-e-arzaq ke shaida dida-e-ahu bhi dekh

ai sunahri zulf ke qaidi siyah gesu bhi dekh

kar chuka sair asl markaz par to aana chahiye

apne ghar kei samt bhi aankhen uThana chahiye

puKHta-kari sikh ye aain-e-KHami ta-kuja

jada-e-afrang par yun tez-gami ta-kuja

soch tu ji mein ye jhuTi nek-nami ta-kuja

maghribi tahzib ka tauq-e-ghulami ta-kuja

mard agar hai ghair kei taqlid karna chhoD de

chhoD de lillah bil-aqsat marna chhoD de