na mera makan hi badal gaya na tera pata koi aur hai

na mirā makāñ hī badal gayā na tirā pata koī aur hai

mirī raah phir bhī hai muḳhtalif tirā rāsta koī aur hai

pas-e-marg ḳhaak hue badan vo kafan meñ hoñ ki hoñ be-kafan

na mirī lahad koī aur hai na tirī chitā koī aur hai

vo jo mahr bahr-e-nikāh thā vo dulhan kā mujh se mizāh thā

ye to ghar pahuñch ke pata chalā mirī ahliya koī aur hai

mirī qātilā mirī laash se ye bayān lene ko aa.ī thī

na de mulzima ko sazā police mirī qātilā koī aur hai

jo sajā.ī jaatī hai raat ko vo hamārī bazm-e-ḳhayāl hai

jo saḌak pe hotā hai raat din vo mushā.era koī aur hai

kabhī 'mīr'-o-'dāġh' kī shā.irī bhī mo.āmla se hasīn thī

magar ab jo sher meñ hotā hai vo mo.āmla koī aur hai

tujhe kyā ḳhabar ki maiñ kis liye tujhe dekhtā huuñ kan-añkhiyoñ se

ki barāh-e-rāst nazāre meñ mujhe dekhtā koī aur hai

ye jo tītar aur chakor haiñ vahī pakḌeñ un ko jo chor haiñ

maiñ chakor-akor kā kyā karūñ mirī fāḳhta koī aur hai

mujhe maañ kā pyaar nahīñ milā magar is kā baap se kyā gila

mirī vālida to ye kahtī hai tirī vālida koī aur hai

na mera makan hi badal gaya na tera pata koi aur hai

meri rah phir bhi hai muKHtalif tera rasta koi aur hai

pas-e-marg KHak hue badan wo kafan mein hon ki hon be-kafan

na meri lahad koi aur hai na teri chita koi aur hai

wo jo mahr bahr-e-nikah tha wo dulhan ka mujh se mizah tha

ye to ghar pahunch ke pata chala meri ahliya koi aur hai

meri qatila meri lash se ye bayan lene ko aai thi

na de mulzima ko saza police meri qatila koi aur hai

jo sajai jati hai raat ko wo hamari bazm-e-KHayal hai

jo saDak pe hota hai raat din wo mushaera koi aur hai

kabhi 'mir'-o-'dagh' ki shairi bhi moamla se hasin thi

magar ab jo sher mein hota hai wo moamla koi aur hai

tujhe kya KHabar ki main kis liye tujhe dekhta hun kan-ankhiyon se

ki barah-e-rast nazare mein mujhe dekhta koi aur hai

ye jo titar aur chakor hain wahi pakDen un ko jo chor hain

main chakor-akor ka kya karun meri faKHta koi aur hai

mujhe man ka pyar nahin mila magar is ka bap se kya gila

meri walida to ye kahti hai teri walida koi aur hai