na-guzir

ye chāñdnī ye sitāre ye ābshār ye jhiil

ye jugnuoñ kī chamak aur ye titliyoñ kī uḌaan

ye koyaleñ ye papīhe tarah tarah ke ye phuul

ghane ghane se daraḳhtoñ ke mīThe mīThe phal

hasīn ḳhvāb meñ bachche kī jāduī muskān

vafā ḳhulūs mohabbat jihād qurbānī

ye sab qadīm haiñ in meñ nayā to kuchh bhī nahīñ

hamāre apne masā.il bhī sab purāne haiñ

ye kusht-o-ḳhūn ye ġhārat-garī ye barbādī

havā-o-hirs-o-mazālim kī dāstān-e-tavīl

galī galī ye sharāb-o-shabāb ke fitne

zar-o-zamīn kā ab tak vahī qadīm fasād

ye saarī bāteñ hamesha se thiiñ aur aaj bhī haiñ

ye baat ab bhī nahīñ tai huī ki sach kyā hai

agar yahī hai muqaddar hamārī duniyā kā

kisī rasūl ke aane kī kyā zarūrat thī

ye chandni ye sitare ye aabshaar ye jhil

ye jugnuon ki chamak aur ye titliyon ki uDan

ye koyalen ye papihe tarah tarah ke ye phul

ghane ghane se daraKHton ke miThe miThe phal

hasin KHwab mein bachche ki jadui muskan

wafa KHulus mohabbat jihad qurbani

ye sab qadim hain in mein naya to kuchh bhi nahin

hamare apne masail bhi sab purane hain

ye kusht-o-KHun ye ghaarat-gari ye barbaadi

hawa-o-hirs-o-mazalim ki dastan-e-tawil

gali gali ye sharab-o-shabab ke fitne

zar-o-zamin ka ab tak wahi qadim fasad

ye sari baaten hamesha se thin aur aaj bhi hain

ye baat ab bhi nahin tai hui ki sach kya hai

agar yahi hai muqaddar hamari duniya ka

kisi rasul ke aane ki kya zarurat thi