na-KHalaf mizaj ki musaddaqa taslimat

mere badan kī chaar dīvārī ke liye

khanaktī huī miTTī kam thī

is liye ḳhudā ne āñkhoñ meñ kāñch bhar diyā

aur jahannam ke lapakte hue sho.aloñ kī jalan lahū meñ rakh dī

mere hāthoñ meñ laq-o-daq sahrāoñ kī retīlī vahshat

chabā.e hue aks kī lakīreñ banātī rahtī hai

aur zehn ke riste hue patīle meñ

din bhar bardāsht kā laavā khaultā hai

log apne andāzoñ kī jūtiyāñ

mere ehsās ke darvāze pe utārte haiñ

aur kufr kī masjid meñ nañge paañv chale aate haiñ

maiñ apnī zaat meñ itnī muta.assib huuñ ki

lahjoñ ko un ke maslak se pahchāntī huuñ

aur kisī bā-muravvat ḳhānqāh meñ

majbūrī kā sajda nahīñ kartī

koī ġhalīz muskurāhaT merī āñkhoñ ko chhūnā chāhe to

maiñ hoñToñ pe thuuk detī huuñ

lekin sadqa-e-jāriya kā surḳh rumāl uñglī pe nahīñ bāñdh saktī

mere badan ki chaar diwari ke liye

khanakti hui miTTi kam thi

is liye KHuda ne aankhon mein kanch bhar diya

aur jahannam ke lapakte hue shoalon ki jalan lahu mein rakh di

mere hathon mein laq-o-daq sahraon ki retili wahshat

chabae hue aks ki lakiren banati rahti hai

aur zehn ke riste hue patile mein

din bhar bardasht ka lawa khaulta hai

log apne andazon ki jutiyan

mere ehsas ke darwaze pe utarte hain

aur kufr ki masjid mein nange panw chale aate hain

main apni zat mein itni mutassib hun ki

lahjon ko un ke maslak se pahchanti hun

aur kisi ba-murawwat KHanqah mein

majburi ka sajda nahin karti

koi ghaliz muskurahaT meri aankhon ko chhuna chahe to

main honTon pe thuk deti hun

lekin sadqa-e-jariya ka surKH rumal ungli pe nahin bandh sakti