na-shanas

kitne lahjoñ kī kaTāreñ mirī gardan pe chalīñ

kitne alfāz kā siisa mire kānoñ meñ ghulā

jis meñ ik samt dhuñdalkā thā aur ik samt ġhubār

us tarāzū pe mire dard kā sāmān tulā

kam-nigāhī ne basīrat pe uThā.e neze

vahm kī nahr meñ pairāhan-e-afkār dhulā

qaht aisā thā ki barpā na huī majlis-e-ishq

habs aisā thā ki tahqīq kā parcham na khulā

kaun se des meñ rahte haiñ vo monis jin kī

roz ik baat sunāte the sunāne vaale

Thokaroñ meñ hai matā.a-e-dil-e-vīrāñ kab se

kyā hue ġham ko sar āñkhoñ pe biThāne vaale

raat sunsān hai be-nūr sitāre maddham

kyā hue raah meñ palkoñ ko bichhāne vaale

ab to vo din bhī nahīñ haiñ ki mire naam ke saath

aap kā naam batāte the zamāne vaale

kitne lahjon ki kaTaren meri gardan pe chalin

kitne alfaz ka sisa mere kanon mein ghula

jis mein ek samt dhundalka tha aur ek samt ghubar

us taraazu pe mere dard ka saman tula

kam-nigahi ne basirat pe uThae neze

wahm ki nahr mein pairahan-e-afkar dhula

qaht aisa tha ki barpa na hui majlis-e-ishq

habs aisa tha ki tahqiq ka parcham na khula

kaun se des mein rahte hain wo monis jin ki

roz ek baat sunate the sunane wale

Thokaron mein hai mataa-e-dil-e-viran kab se

kya hue gham ko sar aankhon pe biThane wale

raat sunsan hai be-nur sitare maddham

kya hue rah mein palkon ko bichhane wale

ab to wo din bhi nahin hain ki mere nam ke sath

aap ka nam batate the zamane wale