nadani

ThanDe lafzoñ ke chhīñToñ se

baḌī samajhdārī se aao

is janjāl se

apnā dāman khīñch ke

ham achchhe ban jaa.eñ

paak saaf aur nek

bujhā deñ dil bhaTTī

apne hāthoñ

apnī raah meñ kāñTe bonā

apnā hī ḳhud dushman banñā

apne ḳhuun ke pyāse honā

sisak sisak kar marnā

apnī qabr khodnā

pyaar ke pīchhe pāgal banñā

jaan hathelī par le kar

yuuñ phirnā

jaise us kā koī mol nahīñ hai

ye to baḌī nādānī hai

sachchā.ī ko tah karke sandūq meñ rakh do

ḳhvāb hai husn bhulā do is ko

phuul kī ḳhushbū

tāroñ kī zau

bahkātī hai

in ko chhoḌo

chāñd chor hai

apne dil ko is se bachāo

āsmān kī niilī chādar phaaḌ ke pheñko

phūñk do har us chiiz ko jis se

ranj-o-ġham yā dard-o-alam kī duur duur se

parchhā.īñ bhī paḌ jaane kā andesha ho

lahū meñ jo tūfān uThā.e

man ko aise bhak se jalā de

jaise jeTh kī dhuup meñ jangal

ānan-fānan jal uThte haiñ

pyāre

pyaar bahut hī dukh detā hai

aao ise dafnā deñ

ThanDe lafzon ke chhinTon se

baDi samajhdari se aao

is janjal se

apna daman khinch ke

hum achchhe ban jaen

pak saf aur nek

bujha den dil bhaTTi

apne hathon

apni rah mein kanTe bona

apna hi KHud dushman banna

apne KHun ke pyase hona

sisak sisak kar marna

apni qabr khodna

pyar ke pichhe pagal banna

jaan hatheli par le kar

yun phirna

jaise us ka koi mol nahin hai

ye to baDi nadani hai

sachchai ko tah karke sanduq mein rakh do

KHwab hai husn bhula do is ko

phul ki KHushbu

taron ki zau

bahkati hai

in ko chhoDo

chand chor hai

apne dil ko is se bachao

aasman ki nili chadar phaD ke phenko

phunk do har us chiz ko jis se

ranj-o-gham ya dard-o-alam ki dur dur se

parchhain bhi paD jaane ka andesha ho

lahu mein jo tufan uThae

man ko aise bhak se jala de

jaise jeTh ki dhup mein jangal

aanan-fanan jal uThte hain

pyare

pyar bahut hi dukh deta hai

aao ise dafna den