nam-o-nang

bartarī apnī kyā jatātā hai

ye kamā.ī to tū bhī khātā hai

itnā kahnā dalīl hai goyā

aur tū bhī asiil hai goyā

do sharīfoñ kī sun ke ye takrār

maiñ khaḌā rah gayā sar-e-bāzār

aur hairat meñ aisā ġharq huā

kal-adam ek ek farq huā

nāzish-o-asl-o-rañg ke afsūñ

ġhairat-e-nām-o-nañg ke afsūñ

maiñ yahāñ bhī sabhī qarīnoñ meñ

ek sī dhaḌkaneñ haiñ sīnoñ meñ

kasb-e-majbūr par bhī ye ehsās

izzat-e-nafs aur vaz.a kā paas

aisā bātil tilism-e-rañg huā

munhadim qasr-e-nām-o-nañg huā

is tarah miT ga.iiñ mirī aqdār

qahqaha ban ga.e dar-o-dīvār

ḳhāndānī shanāḳhteñ mat pūchh

izzateñ aur sharāfateñ mat pūchho

bartari apni kya jatata hai

ye kamai to tu bhi khata hai

itna kahna dalil hai goya

aur tu bhi asil hai goya

do sharifon ki sun ke ye takrar

main khaDa rah gaya sar-e-bazar

aur hairat mein aisa gharq hua

kal-adam ek ek farq hua

nazish-o-asl-o-rang ke afsun

ghairat-e-nam-o-nang ke afsun

main yahan bhi sabhi qarinon mein

ek si dhaDkanen hain sinon mein

kasb-e-majbur par bhi ye ehsas

izzat-e-nafs aur waza ka pas

aisa baatil tilism-e-rang hua

munhadim qasr-e-nam-o-nang hua

is tarah miT gain meri aqdar

qahqaha ban gae dar-o-diwar

KHandani shanaKHten mat puchh

izzaten aur sharafaten mat puchho