nam us ka

naam jab letā huuñ hoñToñ par zabāñ ko phertā huuñ kyuuñ ki

us ke naam meñ us kī zabāñ us ke laboñ kā zā.iqa hai

jab badan vo naam letā hai to aise jhunjhunātā hai ki jaise

us kī zahrī uñgliyoñ ne chhū liyā ho

naam us kā us ke apne bāzuoñ ke dā.ere kī tarah

shorīda-badan ko ghertā hai

naam us kā pāniyoñ meñ ghol kar pī lo zabāñ luknat-zada

ho jaa.e hai, āñkheñ alag chaḌh jaa.eñ haiñ, jī kuchh kahe

lab kuchh kahe hai,

naam us kā zānū-e-nākatḳhadā.ī par likhe se chhātiyoñ

meñ duudh chhalkāne lage haiñ

naam us kā siyāhiyoñ meñ gholne se sher lā-fānī likhe hai

naam banjar dhartiyoñ meñ thoḌā thoḌā sā chhiḌak dene se

har pal bel-būTe khīñch de hai

naam us harjā.ī kā lene se har sāñkal khule hai

us ko us ke naam se āvāz de diije to chāroñ samt

jo koī sune hai us ke lākhoñ naam dohrāne lage hai

aur kabhī us naam ke sunte hī andar se koī pūchhe hai

kis kā naam lo ho

aur tab ehsās hove hai ki us kā ho ki apnā ho

vahī ik naam to hai

aur tab ehsās hove hai vo ham meñ hai ki us kā naam

ham haiñ

aur tab ehsās hove hai ki yūsuf se zuleḳhā shaam se

rādhā ke hijje hī judā haiñ varna chāroñ

kā tamāsha ek sā hai

nam jab leta hun honTon par zaban ko pherta hun kyun ki

us ke nam mein us ki zaban us ke labon ka zaiqa hai

jab badan wo nam leta hai to aise jhunjhunata hai ki jaise

us ki zahri ungliyon ne chhu liya ho

nam us ka us ke apne bazuon ke daere ki tarah

shorida-badan ko gherta hai

nam us ka paniyon mein ghol kar pi lo zaban luknat-zada

ho jae hai, aankhen alag chaDh jaen hain, ji kuchh kahe

lab kuchh kahe hai,

nam us ka zanu-e-nakatKHadai par likhe se chhatiyon

mein dudh chhalkane lage hain

nam us ka siyahiyon mein gholne se sher la-fani likhe hai

nam banjar dhartiyon mein thoDa thoDa sa chhiDak dene se

har pal bel-buTe khinch de hai

nam us harjai ka lene se har sankal khule hai

us ko us ke nam se aawaz de dije to chaaron samt

jo koi sune hai us ke lakhon nam dohrane lage hai

aur kabhi us nam ke sunte hi andar se koi puchhe hai

kis ka nam lo ho

aur tab ehsas howe hai ki us ka ho ki apna ho

wahi ek nam to hai

aur tab ehsas howe hai wo hum mein hai ki us ka nam

hum hain

aur tab ehsas howe hai ki yusuf se zuleKHa sham se

radha ke hijje hi juda hain warna chaaron

ka tamasha ek sa hai