nama-e-jaanan

muddatoñ ba.ad milā nāma-e-jānāñ lekin

na koī dil kī hikāyat na koī pyaar kī baat

na kisī harf meñ mahrūmi-e-jāñ kā qissa

na kisī lafz meñ bhūle hue iqrār kī baat

na kisī satr pe bhīge hue kājal kī lakīr

na kahīñ zikr judā.ī kā na dīdār kī baat

bas vahī ek hī mazmūñ ki mire shahr ke log

kaise sahme hue rahte haiñ gharoñ meñ apne

itnī be-nām ḳhamoshī hai ki dīvāne bhī

koī saudā nahīñ rakhte haiñ saroñ meñ apne

ab qafas hī ko nasheman kā badal jaan liyā

ab kahāñ tāqat-e-parvāz paroñ meñ apne

vo jo do chaar subū-kash the ki jin ke dam se

gardish-e-jām bhī thī raunaq-e-mai-ḳhāna bhī thī

vo jo do chaar navā-gar the ki jin ke hote

hurmat-e-naġhma bhī thī jur.at-e-rindāna bhī thī

koī maqtal koī zindāñ koī pardes gayā

chand hī the ki ravish jin kī judāgāna bhī thī

ab to bas burda-farosh hai jidhar bhī jaao

ab to har kūcha-o-kū misr kā bāzār lage

sar-e-darbār sitāda haiñ bayāzeñ le kar

vo jo kuchh dost kabhī sāhab-e-kirdār lage

ġhairat-e-ishq ki kal māl-e-tijārat meñ na thī

aaj dekho ki haiñ ambār ke ambār lage

aisā āseb-zada shahr ki dekhā na sunā

aisī dahshat hai ki patthar hue sab ke baazū

dar-o-dīvār-e-ḳharābāt vahī haiñ lekin

na kahīñ qulqul-e-mīnā hai na gul-bāñg-e-subū

be-dilī sheva-e-arbāb-e-mohabbat Thahrā

ab koī aa.e ki jaa.e ''tananāhū-yāhū''

muddaton baad mila nama-e-jaanan lekin

na koi dil ki hikayat na koi pyar ki baat

na kisi harf mein mahrumi-e-jaan ka qissa

na kisi lafz mein bhule hue iqrar ki baat

na kisi satr pe bhige hue kajal ki lakir

na kahin zikr judai ka na didar ki baat

bas wahi ek hi mazmun ki mere shahr ke log

kaise sahme hue rahte hain gharon mein apne

itni be-nam KHamoshi hai ki diwane bhi

koi sauda nahin rakhte hain saron mein apne

ab qafas hi ko nasheman ka badal jaan liya

ab kahan taqat-e-parwaz paron mein apne

wo jo do chaar subu-kash the ki jin ke dam se

gardish-e-jam bhi thi raunaq-e-mai-KHana bhi thi

wo jo do chaar nawa-gar the ki jin ke hote

hurmat-e-naghma bhi thi jurat-e-rindana bhi thi

koi maqtal koi zindan koi pardes gaya

chand hi the ki rawish jin ki judagana bhi thi

ab to bas burda-farosh hai jidhar bhi jao

ab to har kucha-o-ku misr ka bazar lage

sar-e-darbar sitada hain bayazen le kar

wo jo kuchh dost kabhi sahab-e-kirdar lage

ghairat-e-ishq ki kal mal-e-tijarat mein na thi

aaj dekho ki hain ambar ke ambar lage

aisa aaseb-zada shahr ki dekha na suna

aisi dahshat hai ki patthar hue sab ke bazu

dar-o-diwar-e-KHarabaat wahi hain lekin

na kahin qulqul-e-mina hai na gul-bang-e-subu

be-dili shewa-e-arbab-e-mohabbat Thahra

ab koi aae ki jae tananahu-yahu