nostalgia

ka.ī girheñ ki jin ko kholne kī zid meñ

apne nāḳhunoñ ko ham gañvā baiThe

ka.ī bāteñ ki jin ko bāñdhne kī koshishoñ meñ

moch aa.ī thī kalā.ī meñ

ka.ī chehre ki jin ke ḳhāl-o-ḳhat ko ham

miTāne ke jatan meñ

dhote rahte the barābar apne lauh-e-chashm

ab bhī gher lete haiñ

guzarte vaqt ne har tajrabe ko kah ke bachkāna

hameñ qaa.il kiyā lekin

abhī tak ungliyoñ kī Tiis taḌpātī hai rah rah kar

laraztī hai kalā.ī ab bhī

lauh-e-chashm par har naqsh vāzeh-tar hai pahle se

kai girhen ki jin ko kholne ki zid mein

apne naKHunon ko hum ganwa baiThe

kai baaten ki jin ko bandhne ki koshishon mein

moch aai thi kalai mein

kai chehre ki jin ke KHal-o-KHat ko hum

miTane ke jatan mein

dhote rahte the barabar apne lauh-e-chashm

ab bhi gher lete hain

guzarte waqt ne har tajrabe ko kah ke bachkana

hamein qail kiya lekin

abhi tak ungliyon ki Tis taDpati hai rah rah kar

larazti hai kalai ab bhi

lauh-e-chashm par har naqsh wazeh-tar hai pahle se