naTak

rut badlī to bhañvaroñ ne titlī se kahā

aaj se tum āzād ho

parvāzoñ kī saarī samteñ tumhāre naam huiiñ

jaao

jañgal kī maġhrūr havā ke saath uḌo

bādal ke hamrāh sitāre chhū aao

ḳhushbū ke baazū thāmo aur raqs karo

raqs karo

ki is mausam ke sūraj kī kirnoñ kā taaj tumhāre sar hai

lahrāo

ki in rātoñ kā chāñd tumhārī peshānī par apne haath se duā likhegā

gaao

in lamhoñ kī havā.eñ tum ko tumhāre gītoñ par sangīt deñgī

patte kaḌe bajā.eñge

aur phūloñ ke hāthoñ meñ daf hogā

titlī ma.asūmāna hairat se sarshār

siyah shāḳhoñ ke halqe se niklī

sadiyoñ ke jakḌe hue reshmī par phailā.e aur uḌne lagī

khulī fazā kā zā.iqa chakkhā

narm havā kā giit sunā

an-dekhe kohsāroñ kī qāmat naapī

raushniyoñ kā lams piyā

ḳhushbū ke har rang ko chhū kar dekhā

lekin rang havā aur ḳhushbū kā vijdān adhūrā thā

ki raqs kā mausam Thahar gayā

rut badlī

aur sūraj kī kirnoñ kā taaj pighalne lagā

chāñd ke haath duā ke harf hī bhuul ga.e

havā ke lab barfīle sumoñ meñ niile paḌ kar apnī sadā.eñ kho baiThe

pattoñ kī bāñhoñ ke sar be-rang hue

aur tanhā rah ga.e phūloñ ke haath

barf kī lahr ke hāthoñ titlī ko lauT aane kā paiġhām gayā

bhauñre shabnam kī zanjīreñ le kar dauḌe

aur bechain paroñ meñ an-chakhī parvāzoñ kī āshufta pyaas jalā dī

apne kaale nāḳhūnoñ se

titlī ke par noch ke bole

ahmaq laḌkī

ghar vāpas aa jaao

nāTak ḳhatm huā

ḳhvātīn kā ālamī saal

rut badli to bhanwaron ne titli se kaha

aaj se tum aazad ho

parwazon ki sari samten tumhaare nam huin

jao

jangal ki maghrur hawa ke sath uDo

baadal ke hamrah sitare chhu aao

KHushbu ke bazu thamo aur raqs karo

raqs karo

ki is mausam ke suraj ki kirnon ka taj tumhaare sar hai

lahrao

ki in raaton ka chand tumhaari peshani par apne hath se dua likhega

gao

in lamhon ki hawaen tum ko tumhaare giton par sangit dengi

patte kaDe bajaenge

aur phulon ke hathon mein daf hoga

titli masumana hairat se sarshaar

siyah shaKHon ke halqe se nikli

sadiyon ke jakDe hue reshmi par phailae aur uDne lagi

khuli faza ka zaiqa chakkha

narm hawa ka git suna

an-dekhe kohsaron ki qamat napi

raushniyon ka lams piya

KHushbu ke har rang ko chhu kar dekha

lekin rang hawa aur KHushbu ka wijdan adhura tha

ki raqs ka mausam Thahar gaya

rut badli

aur suraj ki kirnon ka taj pighalne laga

chand ke hath dua ke harf hi bhul gae

hawa ke lab barfile sumon mein nile paD kar apni sadaen kho baiThe

patton ki banhon ke sar be-rang hue

aur tanha rah gae phulon ke hath

barf ki lahr ke hathon titli ko lauT aane ka paigham gaya

bhaunre shabnam ki zanjiren le kar dauDe

aur bechain paron mein an-chakhi parwazon ki aashufta pyas jala di

apne kale naKHunon se

titli ke par noch ke bole

ahmaq laDki

ghar wapas aa jao

naTak KHatm hua

KHwatin ka aalami sal