nadi

maiñ nadī huuñ aur mujhe faḳhr hai is baat kā ki maiñ nadī huuñ

chalte rahnā merī aadat hai

apne rāste ḳhud banānā aatā hai mujhe aur achchhā bhī lagtā hai

maiñ nahīñ chāhtī ki koī ek dā.era khīñch ke batā de mujhe

ki ab tā-umr mujhe yahīñ rahnā hai

ek chhoTā sā gol sā mahfūz dā.era

jahāñ nā mujhe pattharoñ se Takrānā hogā

nā hī apne vajūd ko qaa.em rakhne ke liye roz roz jañg laḌnī hogī

merā vajūd sirf paanī se nahīñ banā

merī āzādī merī himmat aur merā junūn

ye sab mil ke banāte haiñ mujhe aur ma.alūm hai mujhe

ki har-pal har lamha

maiñ us manzil kī taraf baḌh rahī huuñ

jahāñ maut ko intizār hai merā

phir bhī maiñ dhīre nahīñ chalnā chāhtī huuñ

balki lamha-dar-lamha merī raftār baḌhtī jā rahī hai

main nadi hun aur mujhe faKHr hai is baat ka ki main nadi hun

chalte rahna meri aadat hai

apne raste KHud banana aata hai mujhe aur achchha bhi lagta hai

main nahin chahti ki koi ek daera khinch ke bata de mujhe

ki ab ta-umr mujhe yahin rahna hai

ek chhoTa sa gol sa mahfuz daera

jahan na mujhe pattharon se Takrana hoga

na hi apne wajud ko qaem rakhne ke liye roz roz jang laDni hogi

mera wajud sirf pani se nahin bana

meri aazadi meri himmat aur mera junun

ye sab mil ke banate hain mujhe aur malum hai mujhe

ki har-pal har lamha

main us manzil ki taraf baDh rahi hun

jahan maut ko intizar hai mera

phir bhi main dhire nahin chalna chahti hun

balki lamha-dar-lamha meri raftar baDhti ja rahi hai