naghma-e-dehli

dekho nigah-e-shauq se dehlī ke nazāre

tahzīb kī jannat hai ye jamunā ke kināre

ye indr ke rañgīn akhāḌe kī parī hai

sadiyoñ meñ ye zevar se tamaddun ke sajī hai

jamhūr ne is shoḳh ke gesū haiñ sañvāre

dekho nigah-e-shauq se dehlī ke nazāre

har ek imārat se ayaañ jāh-o-hasham hai

har iiñT pe tārīḳh-e-vatan is kī raqam hai

har zarre meñ haiñ azmat-e-rafta ke sitāre

dekho nigah-e-shauq se dehlī ke nazāre

mīnār vo mīnara-e-azmat jise kahiye

masjid vo ki sajda-gah-e-fitrat jise kahiye

fankāroñ ne miT miT ke haiñ har naqsh ubhāre

dekho nigah-e-shauq se dehlī ke nazāre

durveshoñ ne bhī is pe mohabbat kī nazar kī

valiyoñ ne sadā phūlne phalne kī duā dī

ye zinda-o-pā.inda hai ḳhvāja ke sahāre

dekho nigah-e-shauq se dehlī ke nazāre

ye 'ġhālib'-o-'āzurda'-o-'ḳhusrau' kī chahetī

gahvāra-e-urdū hai abhī 'dāġh' kī dehlī

dil meñ abhī is ke haiñ mohabbat ke sharāre

dekho nigah-e-shauq se dehlī ke nazāre

bachpan se rahī gardish-e-daurāñ kī sahelī

har daur meñ ye gardish-e-ayyām se khelī

bigḌe jo kabhī vaqt ne abrū haiñ sañvāre

dekho nigah-e-shauq se dehlī ke nazāre

ab ḳhuld kī tasvīr haiñ ye kūcha-o-bāzār

ye zohra-jabīñ ḳhanda-ba-lab paikar-e-anvār

jis tarah utar aa.e hoñ gardūñ se sitāre

dekho nigah-e-shauq se dehlī ke nazāre

dehlī nahīñ ye azmat-e-mashriq kā nishāñ hai

is daur meñ bhī naġhma-gar-e-amn-o-amāñ hai

maġhrib se kaho 'rif.at'-e-dehlī ko pukāre

dekho nigah-e-shauq se dehlī ke nazāre

dekho nigah-e-shauq se dehli ke nazare

tahzib ki jannat hai ye jamuna ke kinare

ye indr ke rangin akhaDe ki pari hai

sadiyon mein ye zewar se tamaddun ke saji hai

jamhur ne is shoKH ke gesu hain sanware

dekho nigah-e-shauq se dehli ke nazare

har ek imarat se ayan jah-o-hasham hai

har inT pe tariKH-e-watan is ki raqam hai

har zarre mein hain azmat-e-rafta ke sitare

dekho nigah-e-shauq se dehli ke nazare

minar wo minara-e-azmat jise kahiye

masjid wo ki sajda-gah-e-fitrat jise kahiye

fankaron ne miT miT ke hain har naqsh ubhaare

dekho nigah-e-shauq se dehli ke nazare

durweshon ne bhi is pe mohabbat ki nazar ki

waliyon ne sada phulne phalne ki dua di

ye zinda-o-painda hai KHwaja ke sahaare

dekho nigah-e-shauq se dehli ke nazare

ye 'ghaalib'-o-'azurda'-o-'KHusrau' ki chaheti

gahwara-e-urdu hai abhi 'dagh' ki dehli

dil mein abhi is ke hain mohabbat ke sharare

dekho nigah-e-shauq se dehli ke nazare

bachpan se rahi gardish-e-dauran ki saheli

har daur mein ye gardish-e-ayyam se kheli

bigDe jo kabhi waqt ne abru hain sanware

dekho nigah-e-shauq se dehli ke nazare

ab KHuld ki taswir hain ye kucha-o-bazar

ye zohra-jabin KHanda-ba-lab paikar-e-anwar

jis tarah utar aae hon gardun se sitare

dekho nigah-e-shauq se dehli ke nazare

dehli nahin ye azmat-e-mashriq ka nishan hai

is daur mein bhi naghma-gar-e-amn-o-aman hai

maghrib se kaho 'rifat'-e-dehli ko pukare

dekho nigah-e-shauq se dehli ke nazare