naghma-e-watan

tujh pe qurbān ho merī jaan aur tan

mere hindostān mere pyāre vatan

ḳhushnumā vādiyāñ terī rashk-e-chaman

ḳhushbuoñ se mo.attar tirā pairahan

har nazāre meñ ra.anā.ī aur bāñkpan

tū bahāroñ kī hai ik hasīñ anjuman

mere hindostāñ mere pyāre vatan

terī nadiyoñ meñ naġhmāt aur qahqahe

pyārī fasleñ tirī pyāre mausam tire

ko.eloñ kī sadā.eñ papīhe kī lai

kitne rūmān-añgez haiñ tere ban

mere hindostāñ mere pyāre vatan

arz-e-kashmīr hai terī jannat-nishāñ

tujh meñ gañg-o-jaman se haiñ dariyā ravāñ

chūmtā hai himāla ruḳh-e-āsmāñ

hind sāgar meñ dhulte haiñ tere charan

mere hindostāñ mere pyāre vatan

pyaar kā desh aur naġhmagī kī zamīñ

amn kī mumlikat āshtī kī zamīñ

nānak aur chishtī-o-kirshn jī kī zamīñ

tū iram hī iram hai zamīñ-tā-gagan

mere hindostāñ mire saare vatan

tujh pe qurban ho meri jaan aur tan

mere hindostan mere pyare watan

KHushnuma wadiyan teri rashk-e-chaman

KHushbuon se moattar tera pairahan

har nazare mein ranai aur bankpan

tu bahaaron ki hai ek hasin anjuman

mere hindostan mere pyare watan

teri nadiyon mein naghmat aur qahqahe

pyari faslen teri pyare mausam tere

koelon ki sadaen papihe ki lai

kitne ruman-angez hain tere ban

mere hindostan mere pyare watan

arz-e-kashmir hai teri jannat-nishan

tujh mein gang-o-jaman se hain dariya rawan

chumta hai himala ruKH-e-asman

hind sagar mein dhulte hain tere charan

mere hindostan mere pyare watan

pyar ka desh aur naghmagi ki zamin

amn ki mumlikat aashti ki zamin

nanak aur chishti-o-kirshn ji ki zamin

tu iram hi iram hai zamin-ta-gagan

mere hindostan mere sare watan