nai-dehli

kyā rañg mire shahr kā gañgā-jamanī hai

dehlī na.ī ujḌī huī dehlī meñ banī hai

qabroñ kā pata hai na mazāroñ kā Thikānā

ye shahr kī ta.amīr hai yā gor-kanī hai

arbāb-e-mashāhīr kā lene ke liye naam

kuchh daur-e-guzishta kī bhī tārīḳh chhanī hai

'irvin' kā kahīñ but to clive kī kahīñ strēt

maidān meñ sabze se bahār-e-chamanī hai

rahte haiñ yahāñ shāhī dafātir ke mulāzim

jin ko na kuchh ehsās-e-ġharībul-vatanī hai

ā.ina-e-ḳhurshīd ko bhī kaaT kar rakh de

jo ḳhaak kā zarra hai vo hiire kī kanī hai

kyā kahte haiñ vo bekas-o-nāchār ki jin ko

is shahr ke basne se ġham-e-be-vatanī hai

khetī jo nahīñ bhiik pe hai in kā guzārā

hāthoñ meñ hī kashkol gale meñ kafnī hai

ye rañg bhī kuchh din meñ badal jā.egā 'kaifī'

kyuuñ ye na.ī-dehlī sabab-e-dil-shikanī hai

kya rang mere shahr ka ganga-jamani hai

dehli nai ujDi hui dehli mein bani hai

qabron ka pata hai na mazaron ka Thikana

ye shahr ki tamir hai ya gor-kani hai

arbab-e-mashahir ka lene ke liye nam

kuchh daur-e-guzishta ki bhi tariKH chhani hai

'irwin' ka kahin but to cliwe ki kahin street

maidan mein sabze se bahaar-e-chamani hai

rahte hain yahan shahi dafatir ke mulazim

jin ko na kuchh ehsas-e-gharibul-watani hai

aaina-e-KHurshid ko bhi kaT kar rakh de

jo KHak ka zarra hai wo hire ki kani hai

kya kahte hain wo bekas-o-nachaar ki jin ko

is shahr ke basne se gham-e-be-watani hai

kheti jo nahin bhik pe hai in ka guzara

hathon mein hi kashkol gale mein kafni hai

ye rang bhi kuchh din mein badal jaega 'kaifi'

kyun ye nai-dehli sabab-e-dil-shikani hai