nai duniya

dil-e-majbūr tū mujh ko kisī aisī jagah le chal

jahāñ mahbūb mahbūba se āzādāna miltā ho

kisī kā narm-o-nāzuk haath apne haath meñ le kar

nikal saktā ho be-khaTke koī sair-e-gulistāñ ko

nigāhoñ ke jahāñ pahre na hoñ dil ke dhaḌakne par

jahāñ chhīnī na jaatī ho ḳhushī ahl-e-mohabbat kī

jahāñ armāñ bhare dil ḳhuun ke aañsū na rote hoñ

jahāñ roñdī na jaatī ho ḳhushī ahl-e-mohabbat kī

jahāñ jazbāt ahl-e-dil ke Thukrā.e na jaate hoñ

jahāñ bāġhī na kahtā ho koī ḳhuddār insāñ ko

jahāñ barsā.e jaate hoñ na kuuḌe zehn-e-insāñ par

ḳhayāloñ ko jahāñ zanjīr pahnā.ī na jaatī ho

kahāñ tak ai dil-e-nādāñ qayām aise gulistāñ meñ

jahāñ bahtā ho ḳhūn-e-garm-e-insāñ shāh-rāhoñ par

darindoñ kī jahāñ chāñdī ho zālim dandanāte hoñ

jhapaT paḌte hoñ shāhīñ jis jagah kamzor chiḌiyoñ par

dil-e-majbūr tū mujh ko kisī aisī jagah le chal

jahāñ mahbūb mahbūba se āzādāna miltā ho

dil-e-majbur tu mujh ko kisi aisi jagah le chal

jahan mahbub mahbuba se aazadana milta ho

kisi ka narm-o-nazuk hath apne hath mein le kar

nikal sakta ho be-khaTke koi sair-e-gulistan ko

nigahon ke jahan pahre na hon dil ke dhaDakne par

jahan chhini na jati ho KHushi ahl-e-mohabbat ki

jahan arman bhare dil KHun ke aansu na rote hon

jahan rondi na jati ho KHushi ahl-e-mohabbat ki

jahan jazbaat ahl-e-dil ke Thukrae na jate hon

jahan baghi na kahta ho koi KHuddar insan ko

jahan barsae jate hon na kuDe zehn-e-insan par

KHayalon ko jahan zanjir pahnai na jati ho

kahan tak ai dil-e-nadan qayam aise gulistan mein

jahan bahta ho KHun-e-garm-e-insan shah-rahon par

darindon ki jahan chandi ho zalim dandanate hon

jhapaT paDte hon shahin jis jagah kamzor chiDiyon par

dil-e-majbur tu mujh ko kisi aisi jagah le chal

jahan mahbub mahbuba se aazadana milta ho