nai paud

ye na.ī paud al-hafīz-o-al-amāñ

ra.ad hai tūfān hai ātish-fishāñ

khelne meñ josh paḌhne meñ ḳharosh

harkatoñ se in kī uḌ jaate haiñ hosh

nāshte kī mez par chhīn aur jhapaT

pheñk deñ chamche rakābī deñ ulaT

aur phir tayyāriyāñ schōl kī

shāmat aa.e mez kī stool kī

ye ga.e aur jaise tūfān tham gayā

ek sannāTā havā meñ tham gayā

shaam ko aate hī naukar par ḳhafā

aaj anDā hai na murġhī khā.eñ kyā

daal meñ gar ghī nahīñ to hai itaab

gar pasnde kam paḌeñ to haiñ kabāb

fikr un ke peT bharne kī karo

aur phir schōl ke qisse suno

aaj moTe master chakrā ga.e

uThte hī dīvār se Takrā ga.e

board par jo kal likhā thā miT gayā

ek baḌā shaitān laḌkā piT gayā

mushkil añgrezī hai hindī bor hai

ye paḌosī kā bhatījā chor hai

laḌkiyoñ ke madrase kī kyā hai baat

roz raste meñ na.ī ik vārdāt

bas meñ ik teacher kā Taḳhnā muḌ gayā

ek laḌkī kā dupaTTa uḌ gayā

ek ustānī kī haiñ chhe ungliyāñ

umr meñ haiñ un se kam un ke miyāñ

har taraf gūñjī huī āvāz hai

vaah kyā sañgīt hai kyā saaz hai

koī ḳhargoshoñ ko dauḌātā phire

koī filmī giit hī gaatā phire

haiñ bahan baiThī huī is taak meñ

bhaa.ī se kaise khilaunā chhīn leñ

farz maamā kā kahānī bhī sunā.eñ

ḳhud bhī jāgeñ dūsroñ ko bhī jagā.eñ

kyā majāl us vaqt tak ye so sakeñ

jab talak ammī kī ghuḌkī sun na leñ

ye nai paud al-hafiz-o-al-aman

rad hai tufan hai aatish-fishan

khelne mein josh paDhne mein KHarosh

harkaton se in ki uD jate hain hosh

nashte ki mez par chhin aur jhapaT

phenk den chamche rakabi den ulaT

aur phir tayyariyan school ki

shamat aae mez ki stool ki

ye gae aur jaise tufan tham gaya

ek sannaTa hawa mein tham gaya

sham ko aate hi naukar par KHafa

aaj anDa hai na murghi khaen kya

dal mein gar ghi nahin to hai itab

gar pasnde kam paDen to hain kabab

fikr un ke peT bharne ki karo

aur phir school ke qisse suno

aaj moTe master chakra gae

uThte hi diwar se Takra gae

board par jo kal likha tha miT gaya

ek baDa shaitan laDka piT gaya

mushkil angrezi hai hindi bor hai

ye paDosi ka bhatija chor hai

laDkiyon ke madrase ki kya hai baat

roz raste mein nai ek wardat

bas mein ek teacher ka TaKHna muD gaya

ek laDki ka dupaTTa uD gaya

ek ustani ki hain chhe ungliyan

umr mein hain un se kam un ke miyan

har taraf gunji hui aawaz hai

wah kya sangit hai kya saz hai

koi KHargoshon ko dauData phire

koi filmi git hi gata phire

hain bahan baiThi hui is tak mein

bhai se kaise khilauna chhin len

farz mama ka kahani bhi sunaen

KHud bhi jagen dusron ko bhi jagaen

kya majal us waqt tak ye so saken

jab talak ammi ki ghuDki sun na len