nai subh

ye sehhat-baḳhsh taḌkā ye sahar kī jalva-sāmānī

ufuq saarā banā jaatā hai dāmān-e-chaman jaise

chhalaktī raushnī tārīkiyoñ pe chhā.ī jaatī hai

uḌaa.e nāziyat kī laash par koī kafan jaise

ubaltī surḳhiyoñ kī zad pe haiñ halqe siyāhī ke

paḌī ho aag meñ bikhrī ġhulāmī kī rasan jaise

shafaq kī chādareñ rañgīñ fazā meñ thartharātī haiñ

uḌaa.e laal jhanDā ishtirākī anjuman jaise

chalī aatī hai sharmā.ī lajā.ī hūr-e-bedārī

bhare ghar meñ qadam tham tham ke rakhtī hai dulhan jaise

fazā gūñjī huī hai sub.h ke taaza tarānoñ se

surūd-e-fat.h par haiñ surḳh faujeñ naġhma-zan jaise

havā kī narm lahreñ gudgudātī haiñ umañgoñ ko

javāñ jazbāt se kartā ho chuhleñ bāñkpan jaise

ye saada saada gardūñ pe tabassum-āfrīñ sūraj

pai-dar-pai kāmyābī se ho stalin magan jaise

sahar ke aa.ine meñ dekhtā huuñ husn-e-mustaqbil

utar aa.ī hai chashm-e-shauq meñ 'kaifī' kiran jaise

ye sehhat-baKHsh taDka ye sahar ki jalwa-samani

ufuq sara bana jata hai daman-e-chaman jaise

chhalakti raushni tarikiyon pe chhai jati hai

uDae naziyat ki lash par koi kafan jaise

ubalti surKHiyon ki zad pe hain halqe siyahi ke

paDi ho aag mein bikhri ghulami ki rasan jaise

shafaq ki chadaren rangin faza mein thartharaati hain

uDae lal jhanDa ishtiraki anjuman jaise

chali aati hai sharmai lajai hur-e-bedari

bhare ghar mein qadam tham tham ke rakhti hai dulhan jaise

faza gunji hui hai subh ke taza taranon se

surud-e-fath par hain surKH faujen naghma-zan jaise

hawa ki narm lahren gudgudati hain umangon ko

jawan jazbaat se karta ho chuhlen bankpan jaise

ye sada sada gardun pe tabassum-afrin suraj

pai-dar-pai kaamyabi se ho stalin magan jaise

sahar ke aaine mein dekhta hun husn-e-mustaqbil

utar aai hai chashm-e-shauq mein 'kaifi' kiran jaise