nanha qasid

tirā nanhā sā qāsid jo tire ḳhat le kar aatā thā

na thā ma.alūm use kis tarah ke paiġhām laatā thā

samajh saktā na thā vo ḳhat meñ kaise raaz pinhāñ haiñ

hurūf-e-sāda meñ kis hashr ke andāz pinhāñ haiñ

use kyā ilm in rañgīñ lifāfoñ meñ chhupā kyā hai

kisī mahvash kā in ke bhejne se mudda.ā kyā hai

magar mujh ko ḳhayāl aatā thā akasr us zamāne meñ

ki us kī hairat-e-tiflī hai kyuuñ gum us fasāne meñ

vo bā.īñ kam-sinī kyā ye na dil meñ sochtā hogā

ki baajī ne hamārī apne ḳhat meñ kyā likhā hogā

aur āḳhir vo usī ko naama likh kar bhejtī kyuuñ haiñ

kabhī bhejā to bhejā lekin akasr bhejtī kyuuñ haiñ

vo pahle se ziyāda bhaa.ī ko kyuuñ pyaar kartī haiñ

lifāfa de ke lutf-e-ḳhās kā iz.hār kartī haiñ

phir aaise ajnabī par us kī baajī mehrbāñ kyuuñ haiñ

agar haiñ bhī to ghar vāloñ se ye bāteñ nihāñ kyuuñ haiñ

aur us ke shubhe kī is se bhī to tā.īd hotī hai

chhupā kar ḳhat ko le jaane kī kyuuñ tākīd hotī hai?

ye nau-ḳhez ajnabī jaane kahāñ se akasr aatā hai

jab aatā hai to baajī kī tarah ḳhat likh ke laatā hai

azīzoñ kī tarah ye kyuuñ makāñ meñ aa nahīñ saktā

jab us se pūchhtā hai vo use samjhā nahīñ saktā

khilaune de kar us ko muskurā detā hai vo akasr

aur ik halkā sā thappaḌ bhī lagā detā hai vo akasr

tire qāsid ke ye afkār dil ko gudgudāte the

aur apne bholpan se mere jazboñ ko hañsāte the

nahīñ mauqūf inhī ayyām par jab bhī ḳhayāl aayā

tasavvur tere ba.ad us kā bhī naqsha sāmne laayā

magar aaj is tarah dekhā hai vo naqsh-e-hasīñ maiñ ne

ki rakh dī ḳhāk-e-hairat par mohabbat kī jabīñ maiñ ne

vahī nanhā sā qāsid naujavāñ ho kar milā mujh ko

zamāne ke taġhayyur ne pareshāñ kar diyā mujh ko

junūn-e-ibtidā-e-ishq ne karvaT sī lī dil meñ

pas-az muddat ye le ke aa ga.ī phir apne muhmal meñ

tire qāsid se milte vaqt mujh ko sharm aatī thī

magar us kī nigāhoñ meñ sharārat muskurātī thī

sharārat kā ye nazzāra mirī hairat kā sāmāñ thā

ki is parda ke andar terā rāz-e-ishq uryāñ thā

tera nanha sa qasid jo tere KHat le kar aata tha

na tha malum use kis tarah ke paigham lata tha

samajh sakta na tha wo KHat mein kaise raaz pinhan hain

huruf-e-sada mein kis hashr ke andaz pinhan hain

use kya ilm in rangin lifafon mein chhupa kya hai

kisi mahwash ka in ke bhejne se muddaa kya hai

magar mujh ko KHayal aata tha akasr us zamane mein

ki us ki hairat-e-tifli hai kyun gum us fasane mein

wo bain kam-sini kya ye na dil mein sochta hoga

ki baji ne hamari apne KHat mein kya likha hoga

aur aaKHir wo usi ko nama likh kar bhejti kyun hain

kabhi bheja to bheja lekin akasr bhejti kyun hain

wo pahle se ziyaada bhai ko kyun pyar karti hain

lifafa de ke lutf-e-KHas ka izhaar karti hain

phir aaise ajnabi par us ki baji mehrban kyun hain

agar hain bhi to ghar walon se ye baaten nihan kyun hain

aur us ke shubhe ki is se bhi to taid hoti hai

chhupa kar KHat ko le jaane ki kyun takid hoti hai?

ye nau-KHez ajnabi jaane kahan se akasr aata hai

jab aata hai to baji ki tarah KHat likh ke lata hai

azizon ki tarah ye kyun makan mein aa nahin sakta

jab us se puchhta hai wo use samjha nahin sakta

khilaune de kar us ko muskura deta hai wo akasr

aur ek halka sa thappaD bhi laga deta hai wo akasr

tere qasid ke ye afkar dil ko gudgudate the

aur apne bholpan se mere jazbon ko hansate the

nahin mauquf inhi ayyam par jab bhi KHayal aaya

tasawwur tere baad us ka bhi naqsha samne laya

magar aaj is tarah dekha hai wo naqsh-e-hasin main ne

ki rakh di KHak-e-hairat par mohabbat ki jabin main ne

wahi nanha sa qasid naujawan ho kar mila mujh ko

zamane ke taghayyur ne pareshan kar diya mujh ko

junun-e-ibtida-e-ishq ne karwaT si li dil mein

pas-az muddat ye le ke aa gai phir apne muhmal mein

tere qasid se milte waqt mujh ko sharm aati thi

magar us ki nigahon mein shararat muskuraati thi

shararat ka ye nazzara meri hairat ka saman tha

ki is parda ke andar tera raaz-e-ishq uryan tha