nannhi farhat

nannhī munnī pyārī farhat

hai māñ-bāp ke dil kī rāhat

shauq se maktab jaatī hai vo

jī paḌhne meñ lagātī hai vo

ustānī jī kī hai vo pyārī

maañ kī hai vo rāj-dulārī

ḳhuub sabaq farfar hai sunātī

maktab se in.aam hai paatī

maañ jo sabaq suntī hai ghar par

pyaar hai kartī ḳhush ho ho kar

baap hai laatā vāste us ke

chīzī kapḌe guḌiyāñ khilaune

aur bhī shauq se paḌhtī hai vo

paḌhne meñ yuuñ baḌhtī hai vo

laḌkiyoñ ko vo chhoḌ ke pīchhe

sab se nikal jaatī hai aage

itne number vo hai paatī

dang hai ustānī rah jaatī

bachchiyo tum bhī shauq se paḌhnā

aglī jamā.at meñ yuuñ chaḌhnā

madrasa bhar meñ naam bhī paao

lo shābāsh in.aam bhī paao

jī paḌhne meñ ḳhuub lagānā

tum bhī farhat ban ke dikhānā

nannhi munni pyari farhat

hai man-bap ke dil ki rahat

shauq se maktab jati hai wo

ji paDhne mein lagati hai wo

ustani ji ki hai wo pyari

man ki hai wo raj-dulari

KHub sabaq farfar hai sunati

maktab se inam hai pati

man jo sabaq sunti hai ghar par

pyar hai karti KHush ho ho kar

bap hai lata waste us ke

chizi kapDe guDiyan khilaune

aur bhi shauq se paDhti hai wo

paDhne mein yun baDhti hai wo

laDkiyon ko wo chhoD ke pichhe

sab se nikal jati hai aage

itne number wo hai pati

dang hai ustani rah jati

bachchiyo tum bhi shauq se paDhna

agli jamaat mein yun chaDhna

madrasa bhar mein nam bhi pao

lo shabash inam bhi pao

ji paDhne mein KHub lagana

tum bhi farhat ban ke dikhana