naqsh bar-diwar

matā-e-dard ko sāhab shu.ūr kho baiThe

sabāt-e-azm ko mard-e-ġhuyūr kho baiThe

nazar se mahv hai ummul-kitāb kī tafsīr

huzūr ma.anī-e-ġhaib-o-zuhūr kho baiThe

gayā jo haath se īmān to tahayyur kyā

vafūr-e-aish meñ taḳht-o-qusūr kho baiThe

dil-o-dimāġh se ruḳhsat jihād kā jazba

sabīl-e-haq ke zarūrī umuur kho baiThe

ḳhudī se baaqī thī maz.hab kī aabrū thoḌī

sharāb-e-faqr kā husn-e-surūr kho baiThe

ġharīb millat-e-ma.asūm kā ḳhudā-hāfiz

faqīh-e-shahr tadayyun kā nuur kho baiThe

qulūb zinda se afsos hāshmī farzand

charāġh ishq-e-ilāhī kā nuur kho baiThe

jahāñ meñ kaise ho me.arāj-e-zindagī hāsil

yaqīñ kī ruuh ko sadrussudūr kho baiThe

hakīm-o-ārif-o-sūfī haiñ naqsh bar-dīvār

dil-o-dimāġh se anvār-e-tūr kho baiThe

zalīl sāhab-e-qur.āñ ho ye nahīñ mumkin

zarūr husn-e-amal ko huzūr kho baiThe

uvais o bū-zar o usmān ke atā-karda

mazāq-e-faqr-e-mohammad zarūr kho baiThe

ḳhulūs-e-dil se thī 'bebāk' shā.erī raushan

payambarī ke suḳhnavar shu.ūr kho baiThe

mata-e-dard ko sahab shuur kho baiThe

sabaat-e-azm ko mard-e-ghuyur kho baiThe

nazar se mahw hai ummul-kitab ki tafsir

huzur mani-e-ghaib-o-zuhur kho baiThe

gaya jo hath se iman to tahayyur kya

wafur-e-aish mein taKHt-o-qusur kho baiThe

dil-o-dimagh se ruKHsat jihad ka jazba

sabil-e-haq ke zaruri umur kho baiThe

KHudi se baqi thi mazhab ki aabru thoDi

sharab-e-faqr ka husn-e-surur kho baiThe

gharib millat-e-masum ka KHuda-hafiz

faqih-e-shahr tadayyun ka nur kho baiThe

qulub zinda se afsos hashmi farzand

charagh ishq-e-ilahi ka nur kho baiThe

jahan mein kaise ho mearaj-e-zindagi hasil

yaqin ki ruh ko sadrussudur kho baiThe

hakim-o-arif-o-sufi hain naqsh bar-diwar

dil-o-dimagh se anwar-e-tur kho baiThe

zalil sahab-e-quran ho ye nahin mumkin

zarur husn-e-amal ko huzur kho baiThe

uwais o bu-zar o usman ke ata-karda

mazaq-e-faqr-e-mohammad zarur kho baiThe

KHulus-e-dil se thi 'bebak' shaeri raushan

payambari ke suKHnawar shuur kho baiThe