nargis-e-mastana

apnā hī sā ai nargis-e-mastāna banā de

maiñ jab tujhe jānūñ mujhe dīvāna banā de

har qaid se har rasm se begāna banā de

dīvāna banā de mujhe dīvāna banā de

ik barq-e-adā ḳhirman-e-hastī pe girā kar

nazroñ ko mirī tuur kā afsāna banā de

har dil hai tirī bazm meñ labrez-e-mai-e-ishq

ik aur bhī paimāna se paimāna banā de

tū sāqi-e-mai-ḳhāna bhī tū nashsha o mai bhī

maiñ tishna-e-hastī mujhe mastāna banā de

allāh ne tujh ko mai o mai-ḳhāna banāyā

tū saarī fazā ko mai o mai-ḳhāna banā de

tū sāqi-e-mai-ḳhāna hai maiñ rind-e-balā-nosh

mere liye mai-ḳhāne ko paimāna banā de

yā dīda-o-dil meñ mire tū aap samā jā

yā phir dil-o-dīda hī ko vīrāna banā de

qatre meñ vo dariyā hai jo aalam ko Dubo de

zarre meñ vo sahrā hai ki dīvāna banā de

lekin mujhe har qaid-e-ta.ayyun se bachā kar

jo chāhe vo ai nargis-e-mastāna banā de

aalam to hai dīvāna jigar! husn kī ḳhātir

tū apne liye husn ko dīvāna banā de

kab tak nigah-e-yār na hogī mutabassim

tū apnā har andāz harīfāna banā de

munkir tū na ban husn ke e.ajāz-e-nazar kā

kahne ke liye apne ko begāna banā de

jab tak karam-e-ḳhās kā dariyā na umañD aa.e

tū aur bhī haal apnā safīhāna banā de

but-ḳhāne aa nikle to ka.aba kī binā Daal

ka.abe meñ pahuñch jaa.e to but-ḳhāna banā de

jo mauj uThe dil se tire josh-e-talab meñ

sar rakh ke vahīñ sajda-e-shukrāna banā de

jab mā.il-e-altāf nazar aa.e vo ḳhud-bīñ

tū har nigah-e-shauq ko afsāna banā de

kaunain bhī mil jaa.e to dāman ko na phailā

kaunain ko bhūlā huā afsāna banā de

phir arz kar is tarah 'jigar' shauq o adab se

bebāk agar jur.at-e-rindāna banā de

tujh ko nigah-e-yār! qasam mere junūñ kī

nāseh ko bhī merā hī sā dīvāna banā de

maiñ huuñ tire qadmoñ meñ mujhe kuchh nahīñ kahnā

ab jo bhī tirā lutf-e-karīmāna banā de

apna hi sa ai nargis-e-mastana bana de

main jab tujhe jaanun mujhe diwana bana de

har qaid se har rasm se begana bana de

diwana bana de mujhe diwana bana de

ek barq-e-ada KHirman-e-hasti pe gira kar

nazron ko meri tur ka afsana bana de

har dil hai teri bazm mein labrez-e-mai-e-ishq

ek aur bhi paimana se paimana bana de

tu saqi-e-mai-KHana bhi tu nashsha o mai bhi

main tishna-e-hasti mujhe mastana bana de

allah ne tujh ko mai o mai-KHana banaya

tu sari faza ko mai o mai-KHana bana de

tu saqi-e-mai-KHana hai main rind-e-bala-nosh

mere liye mai-KHane ko paimana bana de

ya dida-o-dil mein mere tu aap sama ja

ya phir dil-o-dida hi ko virana bana de

qatre mein wo dariya hai jo aalam ko Dubo de

zarre mein wo sahra hai ki diwana bana de

lekin mujhe har qaid-e-tayyun se bacha kar

jo chahe wo ai nargis-e-mastana bana de

aalam to hai diwana jigar! husn ki KHatir

tu apne liye husn ko diwana bana de

kab tak nigah-e-yar na hogi mutabassim

tu apna har andaz harifana bana de

munkir tu na ban husn ke eajaz-e-nazar ka

kahne ke liye apne ko begana bana de

jab tak karam-e-KHas ka dariya na umanD aae

tu aur bhi haal apna safihana bana de

but-KHane aa nikle to kaba ki bina Dal

kabe mein pahunch jae to but-KHana bana de

jo mauj uThe dil se tere josh-e-talab mein

sar rakh ke wahin sajda-e-shukrana bana de

jab mail-e-altaf nazar aae wo KHud-bin

tu har nigah-e-shauq ko afsana bana de

kaunain bhi mil jae to daman ko na phaila

kaunain ko bhula hua afsana bana de

phir arz kar is tarah 'jigar' shauq o adab se

bebak agar jurat-e-rindana bana de

tujh ko nigah-e-yar! qasam mere junun ki

naseh ko bhi mera hi sa diwana bana de

main hun tere qadmon mein mujhe kuchh nahin kahna

ab jo bhi tera lutf-e-karimana bana de