nashat-e-umid

ai mirī ummīd merī jāñ-navāz

ai mirī dil-soz merī kārsāz

merī sipar aur mire dil kī panāh

dard-o-musībat meñ mirī takiya-gāh

aish meñ aur rañj maiñ merī shafīq

koh meñ aur dasht meñ merī rafīq

kāTne vaalī ġham-e-ayyām kī

thāmne vaalī dil-e-nākām kī

dil pa paḌā aan ke jab koī dukh

tere dilāse se milā ham ko sukh

tū ne na chhoḌā kabhī ġhurbat meñ saath

tū ne uThāyā na kabhī sar se haath

jī ko ho kabhī agar usrat kā rañj

khol diye tū nai qanā.at ke ganj

tujh se hai mohtāj kā dil be-hirās

tujh se hai bīmār ko jiine kī aas

ḳhātir-e-ranjūr kā darmāñ hai tū

āshiq-e-mahjūr kā īmāñ hai tū

nuuh kī kashtī kā sahārā thī tū

chaah meñ yūsuf kī dil-ārā thī tū

raam ke ham-rāh chaḌhī ran meñ tū

pāñDav ke bhī saath phirī ban meñ tū

tū ne sadā qais kā bahlāyā dil

thaam liyā jab kabhī ghabrāyā dil

ho gayā farhād kā qissa tamām

par tire fiqroñ pe rahā ḳhush mudām

tū ne hī rāñjhe kī ye bañdhvāī aas

hiir thī furqat meñ bhī goyā ki paas

hotī hai tū pusht pe himmat kī jab

mushkileñ āsāñ nazar aatī haiñ sab

haath meñ jab aa ke liyā tū ne haat

saat samundar se guzarnā hai baat

saath milā jis ko tirā do qadam

kahtā hai vo ye hai arab aur ajam

ghoḌe kī lī apne jahāñ tū ne baag

sāmne hai tere gayā aur praag

azm ko jab detī hai tū mel jast

gumbad-e-gardūñ nazar aatā hai past

tū ne diyā aa ke ubhārā jahāñ

samjhe ki muTThī meñ hai saarā jahāñ

zarre ko ḳhurshīd meñ de khapā

bande ko allāh se de tū milā

donoñ jahāñ kī hai bañdhī tujh se laḌ

diin kī tū asl hai duniyā kī jaḌ

nekiyoñ kī tujh se hai qaa.em asaas

tū na ho to jaa.eñ na nekī ke paas

diin kī tujh bin kahīñ pursish na ho

tū na ho to haq kī parastish na ho

ḳhushk thā bin tere daraḳht-e-amal

tū ne lagā.e haiñ ye sab phuul phal

dil ko lubhātī hai kabhī ban ke huur

gaah dikhātī hai sharāb-e-tahūr

naam hai sidra kabhī tuubā tirā

roz nirālā hai tamāshā tirā

kausar o tasnīm hai yā salsabīl

jalve haiñ sab tere ye be-qāl-o-qīl

ruup haiñ har panth meñ tere alag

hai kahīñ firdaus kahīñ hai sovarg

chhūT ga.e saare qarīb aur ba.iid

ek na chhūTī to na chhūTī umiid

tere hī dam se kaTe jo din the saḳht

tere hī sadqe se milā tāj-o-taḳht

ḳhākiyoñ kī tujh se hai himmat buland

tū na ho to kaam hoñ duniyā ke band

tujh se hī ābād hai kaun-o-makāñ

tū na ho to hai bhī barham jahāñ

koī paḌtā phirtā hai bahr-e-ma.āsh

hai koī iksīr ko kartā talāsh

ik tamannā meñ hai aulād kī

ek ko dil-dār kī hai lau lagī

ek ko hai dhan jo kuchh haath aa.e

dhuum se aulād kī shādī rachā.e

ek ko kuchh aaj agar mil gayā

kal kī hai ye fikr ki khā.eñge kyā

qaum kī bahbūd kā bhūkā hai ek

jin meñ ho un ke liye anjām-e-nek

ek ko hai tishnagī-e-qurb-e-haq

jis ne kiyā dil se jigar tak hai shaq

jo hai ġharaz us kī na.ī justujū

laakh agar dil haiñ to laakh aarzū

tujh se haiñ dil sab ke magar baaġh baaġh

gul koī hone nahīñ paatā charāġh

sab ye samajhte haiñ ki paa.ī murād

kahtī hai jab tū ki ab aa.ī murād

va.ada tirā raast ho yā ho daroġh

tū ne diye haiñ use kyā kyā faroġh

va.ade vafā kartī hai go chand tū

rakhtī hai har ek ko ḳhursand tū

bhātī hai sab ko tirī lait-o-la.al

tū ne kahāñ sīkhī hai ye aaj kal

talḳh ko tū chāhe to shīrīñ kare

bazm-e-azā ko tarab-āgīñ kare

aane na de rañj ko muflis ke paas

rakhe ġhanī us ko rahe jis ke paas

yaas kā paatī hai jo tū kuchh lagāv

saikḌoñ kartī hai utaar aur chaḌhāo

aane nahīñ detī diloñ par hirās

TūTne detī nahīñ tālib kī aas

jin ko mayassar na ho kamlī phaTī

ḳhush haiñ tavaqqo.a pe vo zar-baft kī

chaTnī se roTī kā hai jin kī banāv

baiThe pakāte haiñ ḳhayālī polāv

paañv meñ juutī nahīñ par hai ye zauq

ghoḌā jo sabza ho to niilā ho tauq

faiz ke khole haiñ jahāñ tū ne baab

dekhte haiñ jhoñpaḌe mahloñ ke ḳhvāb

tere karishme haiñ ġhazab dil-fareb

dil meñ nahīñ chhoḌte sabr-o-shakeb

tujh se muhavvis ne jo shūrā liyā

phūñk diyā kaan meñ kyā jaane kyā

dil se bhulāyā zan o farzand ko

lag gayā ghun naḳhl-e-baromañd ko

khāne se piine se huā sard jī

aisī kuchh iksīr kī hai lau lagī

diin kī hai fikr na duniyā se kaam

dhun hai yahī raat din aur sub.h shaam

dhoñknī hai baiTh ke jab dhoñknā

shah ko samajhtā hai ik adnā gadā

paise ko jab taav pe detā hai taav

pūchhtā yāroñ se hai sone kā bhaav

kahtā hai jab hañste haiñ sab dekh kar

rah ga.ī ik aañch kī baaqī kasar

hai isī dhuñd meñ vo āsūda-hāl

tū ne diyā aql pe parda sā Daal

tol kar gar dekhiye us kī ḳhushī

koī ḳhushī is ko na pahuñche kabhī

phirte haiñ mohtāj ka.ī tīra-baḳht

jan ke pairoñ meñ thā kabhī tāj-o-taḳht

aaj jo bartan haiñ to kal ghar karo

maltī hai mushkil se inheñ nān-e-jau

taire sivā ḳhaak nahīñ in ke paas

saarī ḳhudā.ī meñ hai le de ke aas

phūle samāte nahīñ is aas par

sāhib-e-ālam unheñ kahiye agar

khāte haiñ is aas pa qasmeñ ajiib

jhūTe ko ho taḳht na yā-rab nasīb

hotā hai naumīdiyoñ kā jab hujūm

aatī hai hasrat kī ghaTā jhuum jhuum

lagtī hai himmat kī kamar TūTne

hausla kā lagtā hai jī chhūTne

hotī hai be-sabrī o tāqat meñ jañg

arsa-e-ālam nazar aatā hai tañg

jī meñ ye aatā hai ki sam khā.iye

phaaḌ ke yā kapḌe nikal jā.iye

baiThne lagtā hai dil aave kī tarah

yaas Darātī hai chhalāve kī tarah

hotā hai shikva kabhī taqdīr kā

uḌtā hai ḳhāka kabhī tadbīr kā

Thantī hai gardūñ se laḌā.ī kabhī

hotī hai qismat kī hañsā.ī kabhī

jaatā hai qaabū se āḳhir dil nikal

kartī hai in mushkiloñ ko tū hī hal

kaan meñ pahuñchī tirī aahaT jo haiñ

raḳht-e-safar yaas nai bāñdhā vahīñ

saath ga.ī yaas ke pazhmurdagī

ho ga.ī kāfūr sab afsurdagī

tujh meñ chhupā rāhat-e-jāñ kā hai bhed

chhoḌiyo 'hālī' kā na saath ai umiid

ai meri ummid meri jaan-nawaz

ai meri dil-soz meri karsaz

meri sipar aur mere dil ki panah

dard-o-musibat mein meri takiya-gah

aish mein aur ranj main meri shafiq

koh mein aur dasht mein meri rafiq

kaTne wali gham-e-ayyam ki

thamne wali dil-e-nakaam ki

dil pa paDa aan ke jab koi dukh

tere dilase se mila hum ko sukh

tu ne na chhoDa kabhi ghurbat mein sath

tu ne uThaya na kabhi sar se hath

ji ko ho kabhi agar usrat ka ranj

khol diye tu nai qanaat ke ganj

tujh se hai mohtaj ka dil be-hiras

tujh se hai bimar ko jine ki aas

KHatir-e-ranjur ka darman hai tu

aashiq-e-mahjur ka iman hai tu

nuh ki kashti ka sahaara thi tu

chah mein yusuf ki dil-ara thi tu

ram ke ham-rah chaDhi ran mein tu

panDaw ke bhi sath phiri ban mein tu

tu ne sada qais ka bahlaya dil

tham liya jab kabhi ghabraya dil

ho gaya farhad ka qissa tamam

par tere fiqron pe raha KHush mudam

tu ne hi ranjhe ki ye bandhwai aas

hir thi furqat mein bhi goya ki pas

hoti hai tu pusht pe himmat ki jab

mushkilen aasan nazar aati hain sab

hath mein jab aa ke liya tu ne hat

sat samundar se guzarna hai baat

sath mila jis ko tera do qadam

kahta hai wo ye hai arab aur ajam

ghoDe ki li apne jahan tu ne bag

samne hai tere gaya aur prag

azm ko jab deti hai tu mel jast

gumbad-e-gardun nazar aata hai past

tu ne diya aa ke ubhaara jahan

samjhe ki muTThi mein hai sara jahan

zarre ko KHurshid mein de khapa

bande ko allah se de tu mila

donon jahan ki hai bandhi tujh se laD

din ki tu asl hai duniya ki jaD

nekiyon ki tujh se hai qaem asas

tu na ho to jaen na neki ke pas

din ki tujh bin kahin pursish na ho

tu na ho to haq ki parastish na ho

KHushk tha bin tere daraKHt-e-amal

tu ne lagae hain ye sab phul phal

dil ko lubhati hai kabhi ban ke hur

gah dikhati hai sharab-e-tahur

nam hai sidra kabhi tuba tera

roz nirala hai tamasha tera

kausar o tasnim hai ya salsabil

jalwe hain sab tere ye be-qal-o-qil

rup hain har panth mein tere alag

hai kahin firdaus kahin hai sowarg

chhuT gae sare qarib aur baid

ek na chhuTi to na chhuTi umid

tere hi dam se kaTe jo din the saKHt

tere hi sadqe se mila taj-o-taKHt

KHakiyon ki tujh se hai himmat buland

tu na ho to kaam hon duniya ke band

tujh se hi aabaad hai kaun-o-makan

tu na ho to hai bhi barham jahan

koi paDta phirta hai bahr-e-maash

hai koi iksir ko karta talash

ek tamanna mein hai aulad ki

ek ko dil-dar ki hai lau lagi

ek ko hai dhan jo kuchh hath aae

dhum se aulad ki shadi rachae

ek ko kuchh aaj agar mil gaya

kal ki hai ye fikr ki khaenge kya

qaum ki bahbud ka bhuka hai ek

jin mein ho un ke liye anjam-e-nek

ek ko hai tishnagi-e-qurb-e-haq

jis ne kiya dil se jigar tak hai shaq

jo hai gharaz us ki nai justuju

lakh agar dil hain to lakh aarzu

tujh se hain dil sab ke magar bagh bagh

gul koi hone nahin pata charagh

sab ye samajhte hain ki pai murad

kahti hai jab tu ki ab aai murad

wada tera rast ho ya ho darogh

tu ne diye hain use kya kya farogh

wade wafa karti hai go chand tu

rakhti hai har ek ko KHursand tu

bhati hai sab ko teri lait-o-lal

tu ne kahan sikhi hai ye aaj kal

talKH ko tu chahe to shirin kare

bazm-e-aza ko tarab-agin kare

aane na de ranj ko muflis ke pas

rakhe ghani us ko rahe jis ke pas

yas ka pati hai jo tu kuchh lagaw

saikDon karti hai utar aur chaDhao

aane nahin deti dilon par hiras

TuTne deti nahin talib ki aas

jin ko mayassar na ho kamli phaTi

KHush hain tawaqqoa pe wo zar-baft ki

chaTni se roTi ka hai jin ki banaw

baiThe pakate hain KHayali polaw

panw mein juti nahin par hai ye zauq

ghoDa jo sabza ho to nila ho tauq

faiz ke khole hain jahan tu ne bab

dekhte hain jhonpaDe mahlon ke KHwab

tere karishme hain ghazab dil-fareb

dil mein nahin chhoDte sabr-o-shakeb

tujh se muhawwis ne jo shura liya

phunk diya kan mein kya jaane kya

dil se bhulaya zan o farzand ko

lag gaya ghun naKHl-e-baromand ko

khane se pine se hua sard ji

aisi kuchh iksir ki hai lau lagi

din ki hai fikr na duniya se kaam

dhun hai yahi raat din aur subh sham

dhonkni hai baiTh ke jab dhonkna

shah ko samajhta hai ek adna gada

paise ko jab taw pe deta hai taw

puchhta yaron se hai sone ka bhaw

kahta hai jab hanste hain sab dekh kar

rah gai ek aanch ki baqi kasar

hai isi dhund mein wo aasuda-haal

tu ne diya aql pe parda sa Dal

tol kar gar dekhiye us ki KHushi

koi KHushi is ko na pahunche kabhi

phirte hain mohtaj kai tira-baKHt

jan ke pairon mein tha kabhi taj-o-taKHt

aaj jo bartan hain to kal ghar karo

malti hai mushkil se inhen nan-e-jau

taire siwa KHak nahin in ke pas

sari KHudai mein hai le de ke aas

phule samate nahin is aas par

sahib-e-alam unhen kahiye agar

khate hain is aas pa qasmen ajib

jhuTe ko ho taKHt na ya-rab nasib

hota hai naumidiyon ka jab hujum

aati hai hasrat ki ghaTa jhum jhum

lagti hai himmat ki kamar TuTne

hausla ka lagta hai ji chhuTne

hoti hai be-sabri o taqat mein jang

arsa-e-alam nazar aata hai tang

ji mein ye aata hai ki sam khaiye

phaD ke ya kapDe nikal jaiye

baiThne lagta hai dil aawe ki tarah

yas Daraati hai chhalawe ki tarah

hota hai shikwa kabhi taqdir ka

uDta hai KHaka kabhi tadbir ka

Thanti hai gardun se laDai kabhi

hoti hai qismat ki hansai kabhi

jata hai qabu se aaKHir dil nikal

karti hai in mushkilon ko tu hi hal

kan mein pahunchi teri aahaT jo hain

raKHt-e-safar yas nai bandha wahin

sath gai yas ke pazhmurdagi

ho gai kafur sab afsurdagi

tujh mein chhupa rahat-e-jaan ka hai bhed

chhoDiyo 'haali' ka na sath ai umid