نصیحت

باپ نے بیٹے کو بلوا کر یہ پوچھا کیا ہوا

امتحاں کا آج ہی تو تھا نتیجہ کیا ہوا

یہ کہا بیٹے نے فوراً اپنا سینہ تان کر

آپ خوش ہوں گے یقیناً یہ حقیقت جان کر

کم ہی کرتے ہیں کیا جو آپ کی اولاد نے

سامنے سب کے کہا مجھ سے مرے استاد نے

ہم تمہیں جانے نہ دیں گے اس جماعت سے ابھی

تم ہی رونق ہو یہاں کی اور تم ہی روشنی

چین سے اگلے برس بھی جان من رہنا یہیں

ان کو جانے دو اگر جاتے ہیں باقی ہم نشیں

سر بلند اور شادماں اسکول سے آیا ہوں میں

خرچ کاپی اور کتابوں کا بچا لایا ہوں میں

باپ بولا واہ بیٹے کر دیا تو نے کمال

فیملی میں اس طرح کی ہے کہاں کوئی مثال

فکر مت کر شان سے ایسے ہی تو اسکول جا

اک برس کافی نہ ہو تو جو لگیں اتنے لگا

یہ نصیحت ہے مگر مت باپ کی عزت سے کھیل

پاس تو بے شک نہ ہو لیکن کبھی ہونا نہ فیل