natija chahiye har shai ka

mujhe na.aroñ se raġhbat hai

vo mere ḳhuun kī hiddat kā baa.is haiñ

vo merī zindagī kā juzv-e-lā-yanfak

hazāroñ saal se mere irādoñ hausloñ aur valvaloñ kī

dāstānoñ meñ numāyāñ haiñ

vo merī zaat ke ā.īna-ḳhāne meñ musalsal raqs karte haiñ

zamāne merī yādoñ se phisal kar sāmne aa.e

to maiñ ik dasht-e-imkāñ se nikal kar muskurā uTThā

mire atrāf meñ rañgoñ kī bārish thī

havāoñ meñ ḳhushī tahlīl ho kar rāhat-e-jāñ thī

ḳhunuk paanī ke chashme duudh kī nahreñ

mirī ḳhvāhish pe bahte the

sabhī asmār mere ik ishāre par mirī jholī meñ aa girte

har ik jānib hasīñ phūloñ ke taḳhte the

ḳhirāmāñ sā.atoñ kī be-karānī merā hāsil thī

ḳhirāmāñ sā.ateñ lekin mujhe kab raas aa.ī haiñ

sukūñ lā-hāsilī kā be-natīja zindagī kā bāb-e-avval hai

natīja chāhiye

har shai kā ik āġhāz ik anjām hotā hai

usī lamhe mirī āñkhoñ pe ik kauñdā sā lapkā thā

usī lamhe zabāñ par ek na.ara thā baġhāvat kā

baġhāvat kā ki apnī zaat ke elaan karne kā

mujhe naron se raghbat hai

wo mere KHun ki hiddat ka bais hain

wo meri zindagi ka juzw-e-la-yanfak

hazaron sal se mere iradon hauslon aur walwalon ki

dastanon mein numayan hain

wo meri zat ke aaina-KHane mein musalsal raqs karte hain

zamane meri yaadon se phisal kar samne aae

to main ek dasht-e-imkan se nikal kar muskura uTTha

mere atraf mein rangon ki barish thi

hawaon mein KHushi tahlil ho kar rahat-e-jaan thi

KHunuk pani ke chashme dudh ki nahren

meri KHwahish pe bahte the

sabhi asmar mere ek ishaare par meri jholi mein aa girte

har ek jaanib hasin phulon ke taKHte the

KHiraman saaton ki be-karani mera hasil thi

KHiraman saaten lekin mujhe kab ras aai hain

sukun la-hasili ka be-natija zindagi ka bab-e-awwal hai

natija chahiye

har shai ka ek aaghaz ek anjam hota hai

usi lamhe meri aankhon pe ek kaunda sa lapka tha

usi lamhe zaban par ek nara tha baghawat ka

baghawat ka ki apni zat ke elan karne ka