nauha-e-jaan

maiñ thā āvāra-o-barjasta-ḳhirām

aurāq-e-bandagī us kī panāh

nāma-e-ishq thā rishtoñ kā javāz

barq-rau meñ bhī thā kuchh vo bhī rahā

ishq-e-ehsās-e-junūñ ke āsār

kuchh ajab tarah bane naqsh-o-nigār

fart-e-jazbāt se

is darja rahe ham larzāñ

tīsrī quvvat-e-vasvās kahāñ se aa.ī

aur

phir TuuT gayā

larza-bar-andām ta.alluq kā pul

sabz armānoñ pe

vo os paḌī mat pūchho

ab to vo

sahn-e-taḳhayyul bhī hai muddat se udaas

gaahe gaahe

kisī pahlū-e-falak meñ jānāñ

kuchh chaman-zār mahak uThte haiñ

aur

aatī hai sadā-e-bulbul

ishq vo os kā qatra hai

jis ke paḌte hī

TuuT jaatī hai surāhī gul kī

main tha aawara-o-barjasta-KHiram

auraq-e-bandagi us ki panah

nama-e-ishq tha rishton ka jawaz

barq-rau mein bhi tha kuchh wo bhi raha

ishq-e-ehsas-e-junun ke aasar

kuchh ajab tarah bane naqsh-o-nigar

fart-e-jazbaat se

is darja rahe hum larzan

tisri quwwat-e-waswas kahan se aai

aur

phir TuT gaya

larza-bar-andam talluq ka pul

sabz armanon pe

wo os paDi mat puchho

ab to wo

sahn-e-taKHayyul bhi hai muddat se udas

gahe gahe

kisi pahlu-e-falak mein jaanan

kuchh chaman-zar mahak uThte hain

aur

aati hai sada-e-bulbul

ishq wo os ka qatra hai

jis ke paDte hi

TuT jati hai surahi gul ki