nauha

siyah-rāt meñ TimTimāte sitāroñ ke nīche

ḳharoshāñ samundar kī maujeñ tujhe DhūñDhtī haiñ

ḳharoshāñ havā kī sadāoñ meñ terī sadā hai

mirā dil tujhe DhūñDhtā hai

siyah-rāt ashkoñ kī shabnam meñ soī huī hai

har ik pal har ik lamha maazī kā

zinda hai maujūd meñ jāgtā hai

magar terā paikar

tah-e-ḳhāk añdheroñ ke māman meñ soyā huā hai

mirā dil ki mātam-gar-e-raftagāñ hai

tujhe DhūñDhtā hai

maiñ āsūda-e-reg-e-ḳhāmosh

us raat kī jaltī āñkhoñ ko dekhūñ

siyah-rāt meñ TimTimāte hue

un sitāroñ se pūchhūñ

ḳharoshāñ samundar meñ Duubā huā chāñd

kisī ajnabī sar zamīñ par tabassum-kunāñ hai

nuqūsh-e-kaf-e-pā kī manzil kahāñ hai?

yam-e-zindagī sail-dar-sail bahtā huā

ek lamhe ko ruk kar palaT kar na dekhe

siyah-rāt meñ TimTimāte sitāroñ ke nīche

faqat ek shab be-sadā jāgtī hai

shab-e-be-sadā pūchhtī hai

biphartī huī mauj-e-dariyā kidhar se chalī thii?

kidhar ko chalī hai?

mirā dil ki mātam-gar-e-raftagāñ hai

kise DhūñDhtā hai

siyah-raat mein TimTimate sitaron ke niche

KHaroshan samundar ki maujen tujhe DhunDhti hain

KHaroshan hawa ki sadaon mein teri sada hai

mera dil tujhe DhunDhta hai

siyah-raat ashkon ki shabnam mein soi hui hai

har ek pal har ek lamha mazi ka

zinda hai maujud mein jagta hai

magar tera paikar

tah-e-KHak andheron ke maman mein soya hua hai

mera dil ki matam-gar-e-raftagan hai

tujhe DhunDhta hai

main aasuda-e-reg-e-KHamosh

us raat ki jalti aankhon ko dekhun

siyah-raat mein TimTimate hue

un sitaron se puchhun

KHaroshan samundar mein Duba hua chand

kisi ajnabi sar zamin par tabassum-kunan hai

nuqush-e-kaf-e-pa ki manzil kahan hai?

yam-e-zindagi sail-dar-sail bahta hua

ek lamhe ko ruk kar palaT kar na dekhe

siyah-raat mein TimTimate sitaron ke niche

faqat ek shab be-sada jagti hai

shab-e-be-sada puchhti hai

bipharti hui mauj-e-dariya kidhar se chali thi?

kidhar ko chali hai?

mera dil ki matam-gar-e-raftagan hai

kise DhunDhta hai