nauha

ziist aur maut kī sard-o-vīrān sī

do qayāmat numā sarhadeñ

aur pahlū meñ in sarhadoñ ke

vo dhundlī sī bujhtī huī ik lakīr

jis kī dahlīz par āḳhirī saañs lete hue

ruuTh kar ham se koī

jo is muḳhtasar fāsle se guzar jā.egā

lauT kar vo nahīñ aa.egā

sard rātoñ meñ ham us ko āvāz deñ to javāban hameñ

guuñj kī sūrat apnī hī āvāz aatī rahegī

maut ke sard hoñToñ pe jumbish na hogī

par unheñ sard tārīk rātoñ ke siine pe tum dekhnā

kal hameñ ik sitārā chamaktā nazar aa.egā

aur ḳhāmoshiyoñ meñ hameñ jā-ba-jā ek aahaT sī mahsūs hogī

zist aur maut ki sard-o-viran si

do qayamat numa sarhaden

aur pahlu mein in sarhadon ke

wo dhundli si bujhti hui ek lakir

jis ki dahliz par aaKHiri sans lete hue

ruTh kar hum se koi

jo is muKHtasar fasle se guzar jaega

lauT kar wo nahin aaega

sard raaton mein hum us ko aawaz den to jawaban hamein

gunj ki surat apni hi aawaz aati rahegi

maut ke sard honTon pe jumbish na hogi

par unhen sard tarik raaton ke sine pe tum dekhna

kal hamein ek sitara chamakta nazar aaega

aur KHamoshiyon mein hamein ja-ba-ja ek aahaT si mahsus hogi