nawa-e-gumrah-e-shab

ai ḳhvāb-e-ḳhanda

tujhe to maiñ DhūñDne chalā thā

mujhe ḳhabar hī nahīñ thī tū merī uñgliyoñ meñ khilā huā hai

mire sadaf meñ tire hī motī haiñ

merī jeboñ meñ tere sikke khanak rahe haiñ

navā-e-gumrāh-e-dasht-e-shab ke nujūm terī hatheliyoñ par chahak rahe haiñ

mire ḳhalā meñ tamām samteñ tire ḳhalā se utar rahī haiñ

mujhe ḳhabar hī na thī

ki merī nazar kī ainak meñ tere shīshe juḌe hue haiñ

tujhe to maiñ DhūñDne chalā thā

tujhe to maiñ DhūñDne chalā thā

kisī salīb-e-kuhan pe dār-o-rasan ke tārīk rāstoñ kī

thakan meñ farhād kohkan kī sadā-e-sad-chāk meñ kisī chuuk

maiñ ubalte hue lahū meñ khile gul tifl-e-be-gunah ke bikharte rañgoñ

kī uñglī thāme tujhe to maiñ DhūñDne chalā thā

shab-e-tarab hai

shab-e-tarab meñ na saaz utre na nuur bikhrā

na bādaloñ ne phuvār bhejī

na jhiil ne māhtāb uglā

shab-e-tarab hai ai ḳhvāb-e-ḳhanda

shab-e-tarab meñ marī talab kā rabāb ban jā

bujhī ragoñ meñ sharāb ban jā

ai ḳhvāb-e-ḳhanda mirī añgeThī kā ḳhvāb ban jā

ki shab kā aahan pighalne tak merī chimniyoñ ke dhueñ meñ

jugnū malhār gaa.eñ

ai KHwab-e-KHanda

tujhe to main DhunDne chala tha

mujhe KHabar hi nahin thi tu meri ungliyon mein khila hua hai

mere sadaf mein tere hi moti hain

meri jebon mein tere sikke khanak rahe hain

nawa-e-gumrah-e-dasht-e-shab ke nujum teri hatheliyon par chahak rahe hain

mere KHala mein tamam samten tere KHala se utar rahi hain

mujhe KHabar hi na thi

ki meri nazar ki ainak mein tere shishe juDe hue hain

tujhe to main DhunDne chala tha

tujhe to main DhunDne chala tha

kisi salib-e-kuhan pe dar-o-rasan ke tarik raston ki

thakan mein farhad kohkan ki sada-e-sad-chaak mein kisi chuk

main ubalte hue lahu mein khile gul tifl-e-be-gunah ke bikharte rangon

ki ungli thame tujhe to main DhunDne chala tha

shab-e-tarab hai

shab-e-tarab mein na saz utre na nur bikhra

na baadalon ne phuwar bheji

na jhil ne mahtab ugla

shab-e-tarab hai ai KHwab-e-KHanda

shab-e-tarab mein mari talab ka rabab ban ja

bujhi ragon mein sharab ban ja

ai KHwab-e-KHanda meri angeThi ka KHwab ban ja

ki shab ka aahan pighalne tak meri chimniyon ke dhuen mein

jugnu malhaar gaen