nawa-e-pareshan

mirī navā-e-pareshāñ darūn-e-gumbad-e-‘aish

bhaTak rahī hai kisī dil kī aarzū ban kar

kabhī ye barbat-o-chang-o-rabāb kī sūrat

machal rahī hai ḳhunak uñgliyoñ kī jumbish meñ

kabhī jarāhat-e-paikāñ se muztarib ho kar

tamām tīroñ ko tarkash se khīñch laatī hai

kabhī gumān kī sūrat kabhī yaqīñ kī tarah

samā.ī jaatī hai shaffāf ābgīnoñ meñ

sulag rahī hai jo sham’-e-mashām-e-jāñ ban kar

tarāz-e-gul kī javāñ mushk-bez rātoñ meñ

ye chāñdnī kī qabā oḌh kar bhaTaktī huī

sulagte tāroñ kī mai-gūñ surāhiyāñ le kar

ye shabnamī sī fazā os khaa.e ġhuncha-o-gul

ye phūTtī huī kirneñ ye dhuup ye kohsār

ye baḌhte ghaTte se saa.e ye haath uThā.e hue

du'ā.eñ māñgte paikar haiñ yā ki haiñ ashjār

mirī navā-e-pareshāñ se muztarib kyoñ haiñ

meri nawa-e-pareshan darun-e-gumbad-e-‘aish

bhaTak rahi hai kisi dil ki aarzu ban kar

kabhi ye barbat-o-chang-o-rabab ki surat

machal rahi hai KHunak ungliyon ki jumbish mein

kabhi jarahat-e-paikan se muztarib ho kar

tamam tiron ko tarkash se khinch lati hai

kabhi guman ki surat kabhi yaqin ki tarah

samai jati hai shaffaf aabginon mein

sulag rahi hai jo sham’-e-masham-e-jaan ban kar

taraaz-e-gul ki jawan mushk-bez raaton mein

ye chandni ki qaba oDh kar bhaTakti hui

sulagte taron ki mai-gun surahiyan le kar

ye shabnami si faza os khae ghuncha-o-gul

ye phuTti hui kirnen ye dhup ye kohsar

ye baDhte ghaTte se sae ye hath uThae hue

du'aen mangte paikar hain ya ki hain ashjar

meri nawa-e-pareshan se muztarib kyon hain