nawa-e-waqt

patañg uḌāne

maiñ ghar se niklā

to ik za.iif aadmī ne

nārāzgī ke lahje meñ

mujh ko Tokā ki

is fazā meñ

na uḌ sakegī patañg terī

har ek jānib

siyāh bādal haiñ āsmāñ par

na-jāne kab

ek tez bārish

kī zad meñ aa kar

patañg terī jo bhiig jaa.e

to ho ke be-jān

jism us kā

zamīñ pe Tapke

zarā tavaqquf ke baad us ne

ye raa.e bhī dī

patañg-bāzī kā shauq

aisā hī hai tujhe to

patañg uḌāne se pahle

apnī patañg ke jism-e-nā-tavāñ ko

zarūr waterprōf kar le

patang uDane

main ghar se nikla

to ek zaif aadmi ne

naraazgi ke lahje mein

mujh ko Toka ki

is faza mein

na uD sakegi patang teri

har ek jaanib

siyah baadal hain aasman par

na-jaane kab

ek tez barish

ki zad mein aa kar

patang teri jo bhig jae

to ho ke be-jaan

jism us ka

zamin pe Tapke

zara tawaqquf ke baad us ne

ye rae bhi di

patang-bazi ka shauq

aisa hi hai tujhe to

patang uDane se pahle

apni patang ke jism-e-na-tawan ko

zarur waterproof kar le