nawishta-e-pas-e-diwar

ye rañg-o-bū ye nazāre ye bazm-ārā.ī

niyāz-o-nāz-o-adā husn ishq ra.anā.ī

shabāb-e-nazm-o-ġhazal dar pai-e-shakebā.ī

mujhe ye sā.at-guzrāñ kahāñ pe le aa.ī

qarār dekh liyā iztirār dekh liyā

ġham-e-habīb ġham-e-rozgār dekh liyā

udaas chehroñ pe uḌtā ġhubār dekh liyā

navā-e-shauq ko be-iḳhtiyār dekh liyā

ḳhizāñ-gazīda sā rañg-e-bahār dekh liyā

gumāñ-darīda yaqīn taar taar dekh liyā

tamām ishva-e-husn-e-nigār dekh liyā

junūñ kā sajda sar-e-kū-e-yār dekh liyā

savād-e-aql-o-ḳhirad be-vaqār dekh liyā

rahā na ḳhud kā bhī phir e'tibār dekh liyā

kabhī jo dekhā na thā baar baar dekh liyā

na ibtidā kī ḳhabar hai na intihā ma.alūm

navishta-e-pas-e-dīvar kyā hai kyā ma.alūm

ye rang-o-bu ye nazare ye bazm-arai

niyaz-o-naz-o-ada husn ishq ranai

shabab-e-nazm-o-ghazal dar pai-e-shakebai

mujhe ye saat-guzran kahan pe le aai

qarar dekh liya iztirar dekh liya

gham-e-habib gham-e-rozgar dekh liya

udas chehron pe uDta ghubar dekh liya

nawa-e-shauq ko be-iKHtiyar dekh liya

KHizan-gazida sa rang-e-bahaar dekh liya

guman-darida yaqin tar tar dekh liya

tamam ishwa-e-husn-e-nigar dekh liya

junun ka sajda sar-e-ku-e-yar dekh liya

sawad-e-aql-o-KHirad be-waqar dekh liya

raha na KHud ka bhi phir e'tibar dekh liya

kabhi jo dekha na tha bar bar dekh liya

na ibtida ki KHabar hai na intiha malum

nawishta-e-pas-e-diwar kya hai kya malum