naya frame

safed kāġhaz piilā paḌ chukā hai

aur ibārat dhundlī ho ga.ī hai

jild udhaḌ chukī hai

ise likhne vaalā mar gayā hai

āsār-e-qadīma ke māherīn

aur zabānoñ ke mohaqqiqīn

is natīje par pahuñche haiñ

ye kitāb kisī murda zabān meñ likhī ga.ī hai

jo ab zamīn ke kisī ḳhitte meñ bolī yā samajhtī nahīñ jaatī

raat ke kisī pahar āsār-e-qadīma ke ek māhir kī aañkh khul jaatī hai

vo lakḌī ke vaznī sandūq se kitāb nikāltā hai

bosīda sar-varaq par musannif kī jagah us kā naam likhā hai

kitāb kisī bādshāh ke naam ma.anūn kī ga.ī hai

pahle safhe par sarkārī ḳhazāne kā hisāb hai

dūsre safhe par purohit ke jaarī karda ibādat ke ahkām

tīsre safhe par un mujrmoñ ke naam haiñ

jinheñ ek manhūs duā ke jurm meñ

dūsre din salīb par chaḌhāyā jaanā thā

us ke ba.ad kuchh saada safhāt haiñ

shāyad kitāb kā musannif bhī maar diyā gayā

is kī tasdīq aage kī in duāoñ se hotī hai

jo mare huoñ kī maġhfirat ke liye sarkārī purohitoñ ne māñgeñ

aur jo badlī huī tahrīr meñ thiiñ

kitāb ke āḳhirī safhe par

bādshāh kī maut kī ḳhabar thī

aur is ke nīche ek manhūs duā

jise āsār-e-qadīma ke māhir ne fauran pahchān liyā

safed kaghaz pila paD chuka hai

aur ibarat dhundli ho gai hai

jild udhaD chuki hai

ise likhne wala mar gaya hai

aasar-e-qadima ke maherin

aur zabanon ke mohaqqiqin

is natije par pahunche hain

ye kitab kisi murda zaban mein likhi gai hai

jo ab zamin ke kisi KHitte mein boli ya samajhti nahin jati

raat ke kisi pahar aasar-e-qadima ke ek mahir ki aankh khul jati hai

wo lakDi ke wazni sanduq se kitab nikalta hai

bosida sar-waraq par musannif ki jagah us ka nam likha hai

kitab kisi baadshah ke nam manun ki gai hai

pahle safhe par sarkari KHazane ka hisab hai

dusre safhe par purohit ke jari karda ibaadat ke ahkaam

tisre safhe par un mujrmon ke nam hain

jinhen ek manhus dua ke jurm mein

dusre din salib par chaDhaya jaana tha

us ke baad kuchh sada safhat hain

shayad kitab ka musannif bhi mar diya gaya

is ki tasdiq aage ki in duaon se hoti hai

jo mare huon ki maghfirat ke liye sarkari purohiton ne mangen

aur jo badli hui tahrir mein thin

kitab ke aaKHiri safhe par

baadshah ki maut ki KHabar thi

aur is ke niche ek manhus dua

jise aasar-e-qadima ke mahir ne fauran pahchan liya