naya ishq

ḳhizāñ ke mausam kī pahlī patjhaḌ

hasīn rangoñ sunahre pattoñ kī rahguzar par guzishta barsoñ

kā giit sunñe meñ yuuñ magan hai

ḳhizāñ ke mausam kī pahlī bārish

bikharte ḳhvāboñ kā dukh samo kar

baras rahī hai

shajar pe har sū bikhartī kirneñ

yuuñ Tahniyoñ par sunahre āñchal

sajā sajā kar

numū kā sapnā dikhā rahī haiñ

ajiib mushkil sī aa paḌī hai

shajar kā ye dukh

nayā nahīñ hai

mohabbatoñ kā nayā yaqīñ bhī

nayā nahīñ hai

ḳhizāñ kā mausam jo muḳhtasar hai

magar aTal hai

ye kyā ajab hai

ki vasl-o-furqat kī sarhadoñ par

jo ishq pal pal machal rahā hai

sunahre pattoñ kī sej par kuchh

na.e se ḳhvāboñ kā silsila hai

KHizan ke mausam ki pahli patjhaD

hasin rangon sunahre patton ki rahguzar par guzishta barson

ka git sunne mein yun magan hai

KHizan ke mausam ki pahli barish

bikharte KHwabon ka dukh samo kar

baras rahi hai

shajar pe har su bikharti kirnen

yun Tahniyon par sunahre aanchal

saja saja kar

numu ka sapna dikha rahi hain

ajib mushkil si aa paDi hai

shajar ka ye dukh

naya nahin hai

mohabbaton ka naya yaqin bhi

naya nahin hai

KHizan ka mausam jo muKHtasar hai

magar aTal hai

ye kya ajab hai

ki wasl-o-furqat ki sarhadon par

jo ishq pal pal machal raha hai

sunahre patton ki sej par kuchh

nae se KHwabon ka silsila hai